ᐊᓐ ᐃᔨᒧᐅᓐ ᑭᔭ ᑲᓱᐱᔅᑎᓇᑲᓄᒡ ᐃᔨᒧᐅᓐ ᐊᓯᐱᒧᑕᓄᒡ ᐊᓐᑕ ᐛᓇᑲᑐᐛᐃᑕᑲᓄᒋ ᐊᔅᒋᔭ ᐊᓐᑕ ᓄᓇᐱᒃ
ᐊᓐᑕ 2020 ᐱᐳᓐ, ᐊᓐᑕ ᓄᓇᐱᒃ, ᐊᐅᔅᑲᒡ ᐊᔅᒋᔭ ᐊᑎᓯᓇᑕᐃᑲᓄᒡ ᑲᔅᑎᒋᑕᑲᓄᒋ ᐊᓐᑕ ᒪᓯᓇᑕᐃᑲᓄᒡ ᐛᓇᑲᑐᐛᐃᑕᑲᓄᒋ ᐊᔅᒋᔭ ᐅᑕ ᑯᐸᒃ [ᐊᑎᒂᒡ ᒥᑯ ᐊᐛᒥᔅᑎᑯᓯᔪᔅᑕᒡ Registre des aires protégées au Québec]᙮ ᐊᓐᑕ ᓴᓯᑲᓐ ᒪᒧ ᐊᔅᒋᔭ ᐊᔅᐱᓴᒡ 29,800 km²᙮ ᐊᔅᑯ ᐊᓂᔭ ᐊᔅᒋᔭ ᒐᒋ ᑲᔅᑎᓇᒡ ᒋᔅᑲ ᑭᔭ ᓇᔅᒐ ᐊᔅᒐᐃᑕᒂᒡ ᐊᓇᑲᑐᐛᐃᑕᑲᓄᒡ ᐊᓯᒋᑕᐸᑕᑲᓄᒡ, ᐊᓐᑕ ᒐᑐᑕᑲᓄᒡ ᓇᔅᒐ ᐊᓱᒋᐱᐃᒡ ᐃᔪᒡ ᒐᒋ ᐊᓂᔅᑯᐛᑲᓄᒡ ᑭᔭ ᐃᔨᒧᐅᓐ ᐊᓱᐱᔅᑎᓂᒪᑐᓇᓄᒡ ᒐᐎᑐᑕᑲᓄᒡ ᐊᓐᑕ ᓄᓇᐱᒃ᙮ ᐅᐛ ᐊᑐᔅᒐᐅᓐ ᐊᓐᑕ ᐊᓱᒋᐱᐃᒡ ᐛᔅᑕᐱᑎᒡ ᐊᓐᑕ ᐃᔨᒧᐅᓐ ᒐᓱᐱᔅᑎᓂᒪᑐᓇᓄᒡ ᒐᐃᓯᐱᒧᑕᒥᑲᒡ ᐊᓐᑕ ᐊᔭᔅᑯᔅᑕᑲᓄᒡ ᑭᔭ ᐎᑲᐳᐎᑕᑲᓄᒡ ᓄᓇᐱᒃ ᐛᓇᑲᑐᐛᐃᑕᑲᓄᒋ ᐊᔅᒋᔭ, ᒐᐅᒡ ᐊᑐᔅᒐᒪᑲᓄᒡ ᓄᑎᒻ ᐃᔪᔅᒋᔭ ᐊᓐᑕ 2011-2012 ᐱᐳᓇ᙮
ᐅᐛ ᐊᓯᐱᒧᑕᓄᒡ ᒥᓄᐛᒡ ᐊᓐᒡ ᐊᔭᔭᑎᓇᒡ ᑲᑎᐱᒃ ᐃᔅᒋᒪᐅᒡ ᒋᓴᐅᒋᒪᑲᓐ (KRG), ᐊᔅᒋᔪᐤ ᐊᐱᒋᑕᑦ ᐊᔭᔅᑯᔅᑕᒡ ᒐᒂᔪᐤ, ᐛᒋᑐᔅᒐᒪᑦ ᑲᐛᐎᒐᐅᓯᒋ ᑲᒪᒧᐎᓇᓄᐃᒡ ᐊᓐᑕ ᓄᓇᐱᒃ ᐛᓇᑲᑐᐛᐃᑕᑲᓄᒡ ᐊᔅᒋᔭ ᐊᒪᒧᐎᓇᓄᒡ (PAWG)᙮ ᐊᓐᑕ ᐊᓯᓇᑯᓂᒡ ᐊᑐᔅᒐᐅᓂᔪᐤ ᒐᒋ ᒥᔪᔅᒐᐃᑕᒂᒡ ᐊᓐ ᓄᑎᒻ ᓄᓇᐱᒃ ᐃᔪᔅᒋᔭ ᑭᔭ ᐃᔪᒡ ᒐᒋ ᐎᑎᒺᑲᓄᒡ ᑭᔭ ᑲᓄᐛᐃᑕᒡ ᒐᒋ ᐸᑕᑯᓯᒡ ᐊᓐᑕ ᐊᓯᐱᒧᑕᓄᐃᒡ ᐊᓐᑕ ᐛᑎᒋᐱᐃᒡ ᐊᓄᒡ ᐊᓯᓇᑯᑕᑲᓄᒡ ᐛᓇᑲᑐᐃᐛᐃᑕᑲᓄᒋ ᐊᔅᒋᔭ ᐊᑎᑕᒂᒋ, ᐊᔅᐱᑕᐃᑕᒂᒡ ᑭᔭ ᐊᓯᑐᔅᑲᔅᑕᑲᓄᒡ᙮
ᐊᐅᑯᑦ, ᐃᔪᔅᒋᔭ ᐊᓯᑲᓄᐛᐃᑕᒡ ᓱᒐᐃᑎᒧᐅᓂᔪᐤ ᐊᓐᑕ ᓂᑲᓄᒡ ᐊᓐᑕ ᐸᐸᐃᒄ ᐊᔅᒋᔭ ᐛᓇᑲᑐᐛᐃᑕᑲᓄᒋ ᒐᒥᔪᒋᑕᐸᑕᑲᓄᒋ ᐊᓇᑐᔅᒐᐃᑕᑲᓄᒡ ᐃᔨᒧᐅᓐ, ᔭᐱᒡ ᒐᒋ ᑎᒂᒡ ᑕᑐᐎᒡ ᒐᑐᑕᑲᓄᒡ ᒐᒋ ᓇᔅᒐ ᑎᒂᒡ ᐊᐎᑲᐳᐎᑕᑲᓄᒡ ᑭᔭ ᐊᔅᑕᐃᑕᒂᒡ ᐊᓐᑕ ᐊᔅᒋᔾ ᐛᓇᑲᑐᐛᐃᑕᑲᓄᒡ ᒐᐃᔅ ᒪᒧᔅᑕᑲᓄᒡ ᐃᔨᒧᐅᓐ᙮
ᑕᐊᓐ ᐊᔅᒋᐱᑕᑲᓄᒋ ᐊᔅᒋᔭ ᐊᓇᑲᑐᐛᐃᑕᑲᓄᒋ?
ᑯᒂᒋᒐᒧᐅᓇ ᐊᔅᒋᔾ ᐱᑎᓱ ᒐᒂᓐ ᐊᑎᑕᒂᒡ ᑭᔭ ᑯᒂᒋᒐᒧᐅᓐ ᓂᐱᔾ ᑭᔭ ᓂᒪᔅ ᐊᑎᐸᓂᔅᑕᑲᓄᒡ ᐛᓇᑲᑐᐛᐃᑕᑲᓄᒋ
ᐊᓐᑕ ᓄᓇᐱᒃ, 8 ᐊᔅᒋᔭ ᑭᔭ 1 ᓂᐱᔭ ᐊᑎᐸᓂᔅᑕᑲᓄᒋ ᐛᓇᑲᑐᐛᐃᑕᑲᓄᒋ “ᑯᒂᒋᒐᒧᐅᓐ” ᐊᑎᑯᑕᒡ, ᐊᑎᓱ ᓴᔅ ᐊᓐᑕ ᐊᔅᒋᐱᐃᒡ ᐊᓐᑕ ᐊᑎᑕᒂᒋ ᐊᔅᒋᔭ ᐛᓇᑲᑐᐛᐃᑕᑲᓄᒋ ᑭᔭ ᒪᓯᓇᑕᐃᑲᓄᒋ ᐊᓐᑕ Registre des aires protégées au Québec ᒪᓯᓇᑕᐃᑲᓄᒡ ᒐᒂᓐ ᐛᓇᑲᑐᐛᐃᑕᑲᓄᒡ ᐅᑕ ᑯᐸᒃ᙮. ᐅᐛ ᐛᐃᐱᔅᒋᓴ ᐊᔅᒋᔭ ᐊᑎᐸᓂᔅᑕᑲᓄᒡ ᐊᓐᑐᐛᐃᑕᑲᓄᒡ ᒐᒋ ᓇᑲᑐᐛᐃᑕᑲᓄᒡ ᓴᔅ ᒥᒐᑦ ᑕᑎᐳᓇ ᐊᑎᑯᑕᒡ, ᐊᐛᐸᑎᐛᓄᒡ ᐊᓐᑕ ᐊᓯᐱᒧᑕᒥᑲᒡ ᐊᔅᑯ ᐊᑐᔅᑲᔅᑕᑲᓄᒡ᙮ ᐊᓐᑕ ᒪᔅᑕᔾ, ᐊᓇᑲᑐᐛᐃᑕᑲᓄᒡ ᐊᔅᒋᔭ ᐊᐛᐎᑕᑲᓄᒋ ᒐᑲᔅᑎᓇᒡ ᑕᑈᒧᐅᓂᔪᐤ ᑭᔭ ᒋᔅᑲ ᐊᓂᔭ ᐊᔅᒋᔭ ᑭᔭ ᓂᐱᔭ ᐛᓇᑲᑐᐊᐃᑕᑲᓄᒋ᙮
ᐊᑎᓯᓇᑕᐃᑲᓄᒡ ᐊᔅᒋᔭ ᐊᑎᐸᓂᔅᑕᑲᓄᒋ ᒐᒋ ᓇᑲᑐᐛᐃᑕᑲᓄᒋ ᐊᔅᒋᔭ ᐛᑐᑕᑲᓄᒡ᙮
ᓄᓇᐱᒃ ᐛᓇᑲᑐᐛᐃᑕᒡ ᐊᔅᒋᔭ ᐊᑎᑕᒂᒋ ᓄᒋᒐ ᒥᓄᐛᒡ ᐊᔅᑎᒋᑕᒡ 8 ᔭᓇᐤ ᐊᑎᓯᓇᑕᐃᑲᓄᒡ ᐊᔅᒋᔭ ᐊᑎᐸᓂᔅᑕᑲᓄᒋ ᒐᒋ ᓇᑲᑐᐛᐃᑕᑲᓄᒋ ᐊᔅᒋᔭ ᐛᑐᑕᑲᓄᒡ᙮ (TRPA) ᑭᔭ ᑲᓄᔅᒋᑕᑲᓄᒋ 2 ᓂᓱ ᓴᔅ ᐊᑎᒂᒋ ᐊᔅᒋᔭ᙮ ᐊᓐᑕ ᔭᐱᒡ 1 ᐸᐃᒄ TRPA ᑲᔅᑎᒋᑕᑲᓄᒡ ᐊᔅᑯ ᐊᓐᑕ 2020 ᐱᐳᓐ ᐃᔨᒧᐅᓐ ᑲᐎᐱᑕᑲᓄᒡ᙮ ᐅᐛ ᐊᑎᑯᑕᒡ ᐊᒥᔽᓄᒡ ᐊᓐᑕ ᒐᒋ ᓂᑲᐃᑭᓄᒡ ᐛᐃᐱᔅᒋᓴ ᐊᓐᑕ ᒐᒋ ᒥᔭᑲᓄᒡ ᑲᓄᑎᓯᓇᒡ ᓯᓂᔾ ᐊᑦᔅᒐᐅᓐ ᑭᔭ ᒐᐊᑲ ᑕᑈᑐᐛᑲᓄᒡ ᐊᓐᑕ ᓯᓂᔾ ᐛᒧᓇᐃᑲᓄᒡ ᐊᑐᔅᒐᐅᓐ ᒐᒋ ᐊᑐᑕᑲᓄᒡ, ᔭᐱᒡ ᓂᒥᔅᒋᐅᔅᑯᑕᐤ ᑭᔭ ᒪᒃ ᒥᔅᑎᒄ ᐊᑐᔅᒐᐅᓐ ᒐᒋ ᒋᒋᐱᑕᑲᓄᒡ᙮ ᐊᓐᑕ ᐛᐱᐧᑯᒋᑕᑲᓄᒡ ᐊᓂᔭ ᓄᑎᒻ TRPA ᒐᒋ ᑲᓄᐛᐃᑕᒡ ᒐᒋ ᒋᔅᑲ ᓇᑲᑐᐛᐃᑕᑲᓄᒋ ᐊᔅᒋᔭ ᑭᔭ ᓂᐱᔾ᙮
ᐊᓄᑕᐱᐃᔭᒡ ᐊᑐᔅᒐᐅᓐ ᒐᒋ ᒋᒥᑕᑲᓄᒡ ᐛᒋᑕᐱᒥᒋᒡ ᐊᓐᑐᐛᔅᒋᒥᓇᒡ, ᒥᔅᑯᒡ ᒐᒋ ᐅᑕ ᑎᐸᑕᑲᓄᒡ ᒐᒋ ᓇᑲᑐᐛᐃᑕᑲᓄᒡ ᒋᒍᐛ ᐊᔅᑕᐃᑕᒂᒡ ᐊᔅᒋᔭ ᒐᒋ ᐅᒡ ᐱᑲᔅᒋᑯᔭᒡ ᐃᔪᐤ ᒥᒋᒻ – ᒧᔭᒻ ᓯᐱᔾ Kovik ᑭᔭ ᐎᓂᐸᒄ – ᒥᔅᑯᒡ ᒐᒋ ᑎᒂᒡ ᐊᑐᔅᒐᐅᓐ ᑭᔭ ᐊᔅᑯ ᒐᒋ ᐃᔪᐤ ᒥᒋᒻ ᑲᓄᐛᐃᑎᒪᒡ᙮”
ᑲᑕᒡ ᐊᓐᑕ ᐃᔨᒧᐅᓐ ᑲᓱᐱᔅᑎᓂᒪᑐᓇᓄᒡ ᐊᓐᑕ 2011-2012 ᐱᐳᓇ ᐊᔅᒋᔭ ᐛᓇᑲᑐᐛᐃᑕᑲᓄᒋ
ᐅᐛᓐᒋ ᐊᓐᒡ ᑲᐛᐎᒐᐅᓯᒡ?
ᐃᔪᔅᒋᔭ ᐊᓐᑕ ᓄᓇᐱᒃ
ᐊᓐᑕ ᓄᓇᐱᒃ, ᐸᐸᐃᒄ ᐃᔅᒋᒪᐅᒡ, ᓇᔅᑲᐱ ᑭᔭ ᒋᒥᔅ ᐱ ᐊᐅᑯᒡ ᐊᔅᑕᐃᑕᑯᓯᒡ ᐊᓐᑕ ᐊᔭᔅᑯᔅᑕᑲᓄᒡ ᒐᐃᓯᐱᒧᑕᒥᑲᒡ ᐛᓇᑲᑐᐛᐃᑕᑲᓄᒋ ᐊᔅᒋᔭ᙮ ᐊᓐᒡ ᐃᔅᒋᒪᐅᒡ, ᔭᐱᒡ ᐊᓂᔭ ᓇᔅᑲᐱ ᒋᓴᐅᒋᒪᑲᓇ ᐅᑕ ᑲᐛᐛᒋᑲᒪᒡ ᑭᔭ ᒋᒥᔅ ᐱ ᒋᓴᒋᒪᑲᓐ ᐊᓐᑕ ᐛᐱᒪᑯᔅᑐᐎᔾ, ᐊᓐᑕ ᐱᑎᓱ ᐊᑕᒡ ᐊᓐᑕ ᐊᓯᐱᒧᑕᓄᒡ ᐊᑐᔅᑲᔅᑕᑲᓄᒡ᙮
ᓄᓇᐱᒃ ᐛᓇᑲᑐᐛᐃᑕᑲᓄᒡ ᐊᔅᒋᔾ ᐛᒋᑐᔅᑲᔅᑕᑲᓄᒡ ᑲᒪᒧᐎᓇᓄᒡ (PAWG)
ᐊᓐ ᓄᓇᐱᒃ ᑲᒪᒧᐎᓇᓄ PAWG, ᑲᐎᑲᐳᐎᑕᑲᓄᒡ ᐊᓐᑕ 2013 ᐱᐳᓐ, ᐊᓐᑕ ᒐᐅᒡ ᓇᓴᐃᑲᓄᒡ ᐊᓐᑕ ᐱᑯᓴᐃᔨᒧᐅᓐ ᑯᒂᒋᒐᒧᐅᓇ ᐊᓐᑕ 2011-12 ᐱᐳᓇ ᐃᔪᔅᒋᔭ ᑲᓱᐱᔅᑎᓂᒪᑐᓇᓄᒡ ᐃᔨᒧᐅᓐ ᐊᓐᑕ ᑲᐎᑲᐳᐎᑕᑲᓄᒡ ᓄᓇᐱᒃ ᐛᓇᑲᑐᐛᐃᑕᑲᓄᒡ ᐊᔅᒋᔭ ᐊᑎᑕᑯᓂᒋ᙮ ᐊᓐᑕ ᐊᓯᓇᒂᒡ ᑯᐸᓇᓴᒡ ᐊᓐᑕ ᐊᓐᑕ ᑕᑐᐎᒡ ᑯᐸᓇᓴᒡ ᑲᐛᐎᒐᐅᓯᒡ:
- ᑲᑎᐱᒃ ᒋᓴᐅᒋᒪᑲᓐ (KRG)
- ᒋᓴᐅᒋᒪᑲᓐ ᐊᔅᒋᔾ ᐊᓯᒥᔅᑯᒋᐱᐃᒡ ᒋᓯᒄ ᐊᓐᑕ ᐊᐛᓯᓯᒡ ᑭᔭ ᐊᔅᒋᔭ ᐊᒪᓐᑕᐅᓇᓄᒡ ᒐᒋ ᐛᐸᑕᑲᓄᒡ
- (MELCCFP)
- ᒋᓴᐅᒋᒪᑲᓐ ᐛᔅᑲ ᒐᒂᓐ ᐊᑎᒂᒡ ᐊᔅᒋᒡ ᐊᑎᒂᒡ ᑭᔭ ᒥᓇᔎᐤ (MRNF)
- ᒋᓴᐅᒋᒪᑲᓐ ᐊᑐᔅᒐᐅᓐ, ᓂᒥᔅᒋᐅᔅᑯᑕᐤ ᐊᑐᔅᑲᔅᑕᑲᓄᒡ (MEIE)
- ᒋᐛᑎᓄᒡ ᐊᑐᔅᒐᐅᓐ ᐛᒋᒥᑕᑲᓄᒡ Plan Nord (SPN)
ᑲᐛᐎᒐᐅᓯᒡ ᑲᒪᒧᐎᓇᓄᒡ ᐛᒋᑐᔅᒐᒪᒡ ᐊᔅᒋᔾ ᐛᓇᑲᑐᐛᐃᑕᑲᓄᒡ ᑲᒪᒧᐎᓇᓄᒡ PAWG
ᑲᐛᐎᒐᐅᓯᒡ ᑲᒪᒧᐎᓇᓄᐃᒡ ᐊᐱᔅᑕᒡ, ᑲᐎᑲᐳᐎᑕᑲᓄᒡ 2017 ᐱᐳᓐ, ᐛᒋᔅᒐᐃᑕᒂᒡ ᐃᔨᒧᐅᓐ ᒐᒋ ᐊᓱᐱᔅᑎᓂᒪᑐᓇᓄᒡ ᑭᔭ ᐊᒥᔪᑐᔅᒐᐃᑕᑲᓄᒡ ᐊᓐᑕ ᐊᔅᒋᔭ ᐛᓇᑲᑐᐛᐃᑕᑲᓄᒋ ᑲᒪᒧᐎᓇᓄᒡ PAWG’s ᐊᓯᑐᔅᑲᔅᑕᒡ ᐊᔅᒋᔾ ᐛᓇᑲᑐᐛᐃᑕᑲᓄᒡ ᐊᓯᔭᔅᑯᔅᑕᑲᓄᒡ ᐊᑐᔅᑲᔅᑕᑲᓄᒡ᙮ ᐊᓐᑕ ᐊᐱᔅᑕᒡ ᑯᐸᓇᓴᒡ ᐊᓐᑕ ᐅᒋᒪᐅᓂᒡ:
- ᑲᑎᐱᒃ ᒋᓴᐅᒋᒪᑲᓐ (KRG)
- ᒪᑭᐱᒃ ᒋᓴᐅᒋᒪᑲᓐ
- ᒋᒥᔅ ᐱ ᒋᓴᐅᒋᒪᑲᓐ
- ᓇᔅᑲᐱ ᐅᒋᒪᐅᓂᒡ ᐅᑕ ᑲᐛᐛᒋᑲᒪᒡ
- ᒋᓴᐅᒋᒪᑲᓐ ᐊᔅᒋᔾ ᐊᓯᒥᔅᑯᒋᐱᐃᒡ ᒋᓯᒄ ᐊᓐᑕ ᐊᐛᓯᓯᒡ ᑭᔭ ᐊᔅᒋᔭ ᐊᒪᓐᑕᐅᓇᓄᒡ ᒐᒋ ᐛᐸᑕᑲᓄᒡ (MELCCFP)
Tap on the diagram to enlarge it.
ᐊᑎᑯᑕᒡ ᐊᓄᒡ ᐊᑐᔅᒐᐅᓐ ᐃᔨᒧᐅᓐ
1998 ᐱᐳᓐ: ᐛᒋᑐᔅᑲᔅᑕᑲᓄᒡ ᐊᔭᔅᑯᔅᑕᑲᓄᒡ ᐊᓐᑕ ᐊᔅᒋᔭ ᔭᐱᒋᑕᑲᓄᒡ ᐊᓐᑕ ᑲᑎᐱᒃ ᐊᔅᒋᒡ ᐃᑕᐅᓂᒡ
2008–2009 ᐱᐳᓐ: ᐸᐃᑯᓴᑉ 11 ᑲᐱᑯᓴᐃᔨᒧᐅᓇᓄᒡ ᐊᔅᒋᔭ ᐛᓇᑲᑐᐛᐃᑕᑲᓄᒋ
2011 ᐱᐳᓐ: ᐃᔨᒪᐅᓐ ᑲᐎᐱᑕᑲᓄᒡ ᐊᓐᑕ ᒋᐛᑎᓄᒡ ᐊᑐᔅᒐᐅᓐ ᐛᒋᒥᑕᑲᓄᒡ ᑭᔭ ᓄᓇᐱᒃ ᐊᑐᔅᒐᐅᓐ ᒐᒋ ᐎᑲᐳᐎᑕᑲᓄᒡ
2011–2012 ᐱᐳᓐ: ᐃᔪᔅᒋᔾ ᐃᔨᒧᐅᓐ ᐊᓱᐱᔅᑎᓂᒪᑐᓇᓄᒡ ᐊᓐᑕ ᐊᔅᒋᔭ ᐛᓇᑲᑐᐛᐃᑕᑲᓄᒋ ᐊᓐᑕ ᓄᓇᐱᒃ
2012–2014 ᐱᐳᓐ: Parnasimautik ᐱᒪᑎᓯᔪᐅᓐ ᑲᔭᔅᑯᔅᑕᑲᓄᒡ ᐊᑐᔅᑲᔅᑕᑲᓄᒡ
2012 ᐱᐳᓐ: ᐃᔨᒧᐅᓐ ᑲᐎᑕᑲᓄᒡ ᐊᓐᑕ ᑲᔅᑕᑲᓄᒡ ᒐᒋ ᓇᑲᑐᐛᐃᑕᑲᓄᒡ 20% ᐊᔅᒋᔾ ᐊᓐᑕ ᓄᓇᐱ
2013 ᐱᐳᓐ: ᐊᐎᑲᐳᐎᑕᑲᓄᒡ ᓄᓇᐱᒃ ᐛᓇᑲᑐᐛᐃᑕᑲᓄᒡ ᐊᔅᒋᔭ ᑲᒪᒧᐎᓇᓄᒡ
2016 ᐱᐳᓐ: ᐊᒪᒧᔅᑕᑲᓄᒡ ᐊᓐᒡ ᓇᐅᐎᔪᐤ 40 ᐊᔅᒋᔭ ᐛᓇᑲᑐᐛᐃᑕᑲᓄᒋ ᑯᒂᒋᒐᒧᐅᓇ ᐊᓐᑕ ᐊᑲᓄᐛᐃᑕᑲᓄᒡ ᐃᔨᒧᐅᓐ
2017 ᐱᐳᓐ: ᑲᐎᑲᐳᐎᑕᑲᓄᒡ ᑲᐛᐎᒐᓯᒡ ᑲᒪᒧᐎᓇᓄᐃᒡ ᑭᔭ ᐅᔅᑲᒡ ᐊᔅᑕᐃᑕᒂᒡ ᐊᔅᑕᑲᓄᒡ ᒐᒋ ᐊᑐᔅᑲᔅᑕᑲᓄᒡ ᐊᓐᑕ ᑲᐅᒋᐱᐃᒡ ᐸᐃᑯᔅᑕᐤ 9 ᐛᓇᑲᑐᐛᐃᑕᑲᓄᒡ ᐊᔅᒋᔭ ᐊᓐᑦ ᐊᑲᓂᔅᑯᒧᐅᓇᓄᒡ᙮
2018 ᐱᐳᓐ: ᐛᐃᐱᔅᒋᓴ ᐛᓇᑲᑐᐛᐃᑕᑲᓄᒡ ᐊᔅᒋᔾ ᓴᔅ ᑲᔅᑎᓇᑲᓄᒡ
2019 ᐱᐳᓐ: ᑲᒥᓯᓇᑕᐅᑎᓱᓇᓄᒡ ᓂᔅᑯᒧᐅᓐ ᒐᒋ ᑲᓄᐛᐃᑕᑲᓄᒡ ᒥᔅᑎᓯᐳᐤ ᓴᑲᐃᑭᓐ/ᓇᒋᑭᐸᐤ ᓴᐃᑲᐃᑭᓐ Nachicapau/ᐛᔅᑲᐃᑭᓂᔅ Fort Mackenzie (Waskaikinis)
2020 ᐱᐳᓐ: ᐊᔅᑎᒋᑕᑲᓄᒡ ᐊᓐᑕ ᐊᔅᒋᔾ ᐛᓇᑲᑐᐛᐃᑕᑲᓄᒡ ᐅᑕ ᑯᐸᒃ ᑭᔭ ᑲᐅᑎᒋᐱᑕᑲᓄᒡ 20% ᑲᐎᑲᔅᑕᐃᑲᓄᒡ ᐊᔅᒋᔭ ᒐᒋ ᓇᑲᑐᐛᐃᑕᑲᓄᒡ᙮
2021 ᐱᐳᓐ: ᑲᔭᑎᔅᑕᑲᓄᒡ ᐃᑐᐅᓐ ᐛᓇᑲᑐᐛᐃᑕᑲᓄᒡ ᐊᔅᒋᔾ ᐎᓱᐛᐅᓐ
ᒐᒂᓐ ᐊᓐ ᐛᓇᑲᑐᐛᐃᑕᑲᓄᒡ ᐊᔅᒋᔭ ᐊᓐᑕ ᓄᓇᐱᒃ?
ᐊᓐ ᑯᐸᒃ ᒋᓴᐅᒋᒪᑲᓐ ᐊᓯᓇᒂᒡ ᐛᔅᑲ ᐊᓐᑕ ᐊᔅᒋᔭ ᐛᓇᑲᑐᐛᐃᑕᑲᓄᒡ ᐊᔅᒋᔾ ᐊᓐᑕ ᐊᔅᒋᔄᒥᑲᒡ,“…ᐊᓇᑲᑐᐛᐃᑕᑲᓄᒡ ᐊᔅᒋᔾ ᐊᓐᑕ ᑕᑎᐸᓐ ᐊᓯᓇᒂᒡ᙮” ᐊᓐᑕ ᒐᐃᓯᓇᑯᓐ “ᒐᒋ ᐊᔅᒐᐃᑕᒂᒡ ᐊᓐᑕ ᐊᑎᓯᓇᑕᐃᑲᓄᒋ ᐊᔅᒋᔭ ᒐᒋ ᓇᑲᑐᐛᐃᑕᑲᓄᒋ ᐱᑎᓱ ᒐᒂᓐ ᐊᑎᒂᒡ ᐊᔅᒋᒡ ᐊᓐᑕ ᐊᑎᑕᒂᒋ, ᑯᑎᒃ ᐊᓯᓇᒂᒡ ᑕᑎᐸᓐ ᐊᔅᒋᔾ ᐅᑕ ᑯᐸᒃ᙮”
“[…] ᐊᑎᓱ, ᐊᔅᒋᔭ ᑭᔭ ᓂᐱᔾ ᐛᓇᑲᑐᐛᐃᑕᑲᓄᒋ ᐊᓐᑕ ᐊᑎᒂᒡ ᒐᒂᓐ ᐛᓇᑲᑐᐛᐃᑕᑲᓄᒡ ᐊᓐᑕ ᓇᓂᑯᑎᓂ ᐊᑲ ᓱᑲ ᐊᔅᑕᐃᑕᒂᒡ ᐊᓐᑕ ᐛᔅᑲ ᐊᔅᒋᔭ ᐊᓯᓇᒂᒡ᙮ ᒥᔅᑯᒡ, ᓄᑎᒻ ᒐᒂᓐ ᐊᑎᒂᒡ ᐱᑎᓱ ᐊᔅᒋᒡ ᐊᑎᓱ ᐊᓐᑕ ᑯᐸᒃ, ᐛᒧᒡ ᒐᐎᓇᑲᑐᐛᐃᑕᑲᓄᒡ ᑭᔭ ᒐᒋ ᐊᔅᒋᐱᑕᑲᓄᒡ ᐊᓐᑕ ᑯᐸᒃ ᐊᑎᑕᒂᒋ ᐊᔅᒋᔭ ᐛᓇᑲᑐᐛᐃᑕᑲᓄᒋ᙮”
ᐊᓐᑕ ᓄᓇᐱᒃ, ᐃᔪᐤ ᐃᑐᐅᓐ ᐊᔅᐱᓴᒡ ᔭᐱᒡ ᐊᔅᑕᐃᑕᒂᒡ ᐊᓐᑕ ᐊᓯᐱᒧᑕᓄᒡ ᐛᐎᑲᐳᐎᑕᑲᓄᒡ ᐊᔅᒋᔭ ᐛᓇᑲᑐᐛᐃᑕᑲᓄᒋ᙮ ᐊᓐᑕ ᒪᒧ ᑲᔅᑎᔅᑕᑲᓄᒡ ᐊᓇᑲᑐᐛᐃᑕᑲᓄᒡ ᑭᔭ ᐛᐎᑲᐳᐎᑕᑲᓄᒡ ᒐᒂᓐ᙮ ᒪᒧ ᐃᔨᒧᐅᓂᔪᐤ ᒐᐎᑎᒺᑲᓄᒡ ᐊᓐᑕ ᐛᒋᑐᔅᒐᒪᑲᓄᒡ ᐊᐅᑯᓐ ᐊᔅᑕᐃᑕᒂᒡ ᒐᒋ ᐊᑐᑕᑲᓄᒡ᙮ ᑎᐱᐛᐅᓯᔪᐅᓇ ᐊᓐᒡ ᐊᐛᓐᒋ ᐊᔅᑎᓯᓇᑕᐛᑲᓄᒡ ᐊᓐᑕ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓂᒡ (JBNQA) ᑭᔭ ᒋᐛᑎᓄᒡ ᐛᐱᓄᑕᒡ ᑯᐸᒃ ᓂᔅᑯᒧᐅᓂᒡ (NEQA) ᑲᓄᐛᐃᑕᑲᓄᒡ ᑭᔭ ᓂᔭᑲᑐᐛᐸᑕᑲᓄᒡ ᐊᓐᑕ ᐛᓇᑲᑐᐛᐃᑕᑲᓄᒡ ᐊᔅᒋᔭ ᓇᑕ ᓄᓇᐱᒃ᙮
ᑯᒐᒂᓐ ᑭᔭ ᑕᐊᓐ ᒐᐃᔅ ᐊᓐᒡ ᐃᔅᒋᒪᐅᒡ, ᓇᔅᑲᐱ, ᑭᔭ ᒋᒥᔅ ᐱ ᐊᓱᐱᔅᑎᓂᒺᑲᓄᒡ ᐃᔨᒧᐅᓂᔪᐤ?
ᒥᓄᐛᒡ ᒐᐎᑐᑕᑲᓄᒡ ᒐᒋ ᒪᒧᐎᓇᓄᒡ ᐃᔨᒧᐅᓐ ᒐᒋ ᐊᓱᐱᔅᑎᓇᑲᓄᒡ ᒐᒥᔨᑯᒡ ( ᐊᓐᒡ ᐃᔅᒋᒪᐅᒡ, ᓇᔅᑲᐱ, ᒋᒥᔅ ᐱ ᐛᐱᒪᑯᔅᑐᐎᔾ ᒐᒋ ᐊᓱᐱᔅᑎᓇᒡ ᐅᑎᑕᐃᑎᒧᐅᓄᐊᐤ ᐊᓐᑦ ᐊᐛᐎᑲᐳᐎᑕᑲᓄᐃᒡ ᐊᔅᒋᔭ ᐛᓇᑲᑐᐛᐃᑕᑲᓄᒋ, ᐊᓐᑕ ᑲᐃᓯᐱᒧᑕᓄᒡ ᐊᓄᒡ ᐊᑎᑯᑕᒡ ᐃᔨᒧᐅᓐ ᑭᔭ ᐊᔅᑕᐃᑕᒂᒡ ᑭᔭ ᐊᓱᐛᐸᑎᐛᓄᒡ ᐊᓐᑕ ᐊᔅᒋᔭ ᐊᑎᑕᒂᒋ ᐊᓐᑕ ᐊᓯᐱᔅᑎᓇᑲᓄᒡ ᐃᔨᒧᐅᓐ ᐊᓐᑕ ᑕᐊᐱᒐᐱᑭᓂᒡ ᑲᒥᓯᓇᐃᒐᐱᐃᒡ᙮
ᐊᐛᓐᒋ ᐊᓂᔅᑯᐛᑲᓄᒡ ᐃᔨᒧᐅᓐ ᐊᓱᐱᔅᑎᓇᑲᓄᒡ ᒐᑐᑕᑲᓄᒡ ᐊᔭᔅᑯᔅᑕᑲᓄᒡ ᐊᓐᑕ ᓄᑎᒻ ᓄᓇᐱᒃ ᐃᔪᔅᒋᔭ ᐊᓐᑕ ᐊᐳᑈᒡ ᐊᓐᑕ 2022 ᐱᐳᓐ, ᑕᐊᓐ ᒥᑯ ᒐᐃᔅᐱᐃᒡ ᐊᐧᑯᓱᐅᓐ ᒐᐃᑎᑯᑕᒡ (COVID-19)᙮
ᑕᐊᓐ ᒐᐃᔅᐱᐃᒡ ᒋᒋᔅᑕᑲᓄᒐ ᐃᔨᒧᐅᓐ ᐊᒪᒧᐎᓇᓄᒡ ᐊᓱᐱᔅᑎᓇᑲᓄᒡ ᐊᓐᑕ ᒐᒋᑕᐸᑕᑲᓄᒡ ᑕᐊᓐ ᐊᑕᐃᑕᑲᓄᒡ ᐊᓐᑕ ᐃᔪᔅᒋᔭ᙮
ᒐᒂᓐ ᐊᓂᔭ ᑭᔭ ᒪᒃ ᑕᐊᓐ ᒐᐃᓯᓇᒂᒡ ᑕᑐᐎᒡ ᒐᐃᔅ ᐱᒧᑕᓄᒡ ᒐᐅᒡ ᐊᑐᔅᑲᐛᒐᓄᒋ ᐊᓐᑕ ᒐᔅᑕᑲᓄᒡ ᐸᐸᐃᒄ ᐊᓂᔭ ᐊᔅᒋᔭ ᐛᓇᑲᑐᐛᐃᑕᑲᓄᐊᒋ?
ᐛᓇᑲᑐᐛᐃᑕᑲᓄᒡ ᒐᐃᔅ ᐱᒧᑕᓄᒡ ᐊᓐᑕ ᒐᑐᑕᑲᓄᒡ ᐃᔨᒧᐅᓐ ᐊᓂᔭ ᐸᐸᐃᒄ ᐊᔅᒋᔭ ᐛᓇᑲᑐᐛᐃᑕᑲᓄᒋ᙮ ᐊᔭᔭᑎᓇᑲᓄᒡ ᐊᑐᔅᒐᐅᓐ ᒐᒋ ᔭᐱᒡ ᐎᑲᐳᐎᑕᑲᓄᐤ ᐊᓐᑕ ᒐᒋ ᐛᐎᒐᐅᓯᒡ ᑕᑐᐎᒡ ᐛᒋᑐᔅᒐᒪᑲᓄᒡ (ᐃᔪᔅᒋᔭ, ᑯᐸᓇᓴᒡ, ᑯᑎᑲᒡ)᙮