ᑭᐅᒍᑏᑦ ᐊᐱᕆᐅᑎᐅᖏᓐᓇᓲᓄᑦ
ᑭᐅᒍᑎᓂᒃ ᒫᓂ ᑕᑯᒍᓐᓇᖁᑎᑦ ᐊᐱᕆᐅᑎᐅᖏᓐᓇᓲᓄᑦ ᓱᒃᑯᑕᐅᑎᑕᐅᑦᑌᓕᔪᑦ ᒥᑦᓵᓄ, ᐃᓗᓐᓈᓄᓕᖓᔪᑦ ᓄᓇᕕᒻᒥ. ᑭᐅᔭᐅᕋᑕᖕᖏᓛᑦ ᐊᐱᕆᐅᑎᑎᑦ?
ᐊᐸᑕᖏᑦ ᓱᒃᑯᑕᐅᑎᑕᐅᑦᑌᓕᔪᑦ ᓄᓀᑦ
ᓱᓇᐅᕚ ᓱᒃᑯᑕᐅᑎᑕᐅᑦᑌᓕᔪᖅ ᓄᓇ ᓄᓇᕕᒻᒥ?
ᑯᐯᒃᑯᑦ ᑲᕙᒪᒃᑯᖏᓐᓄᑦ, ᐱᐅᓯᕐᓱᑐᕐᒥᒃ ᓄᓇᒥᒃ ᐸᐸᑦᓯᓂᖅ ᓱᒃᑯᑕᐅᑎᑦᓯᑌᓕᓂᑎᒍᑦ ᐃᒣᓕᕗᖅ, “…ᓴᐳᑦᔨᓂᖅ ᑭᒡᒐᑐᕐᑐᓂᒃ ᐆᑦᑑᑎᖏᓐᓂᒃ ᐃᓘᓐᓇᖏᓐᓄᑦ ᖃᓄᐃᑦᑐᑐᐃᓐᓀᑦ ᐆᒪᔪᐃᑦ ᐃᓂᖏᓐᓄᑦ.” ᑌᒣᒻᒪᑦ ᐊᐱᕆᐅᑎ “ᐃᑉᐱᒋᔭᖃᕐᓂᒧᑦ ᓱᒃᑯᑕᐅᑎᑕᐅᑦᑌᓕᔪᓂᒃ ᑭᒡᒐᑐᕐᑐᓂᒃ ᓄᓇᓂᒃ ᐊᑦᔨᐅᖏᑦᑐᓄᑦ ᐆᒪᔪᐃᑦ ᐃᓂᖏᓐᓄᑦ, ᐃᓘᓐᓇᖏᓐᓂ ᐱᓇᓱᐊᕐᑕᐅᔪᓂ, ᐱᑕᖃᓚᖓᔪᒥᒃ ᐆᒪᔪᓕᒫᓂᒃ ᐊᑦᔨᒌᖕᖏᑐᓂᒃ ᑯᐯᒻᒥ.”
“[…} ᑌᒣᒻᒪᑦ, ᖃᓄᐃᑦᑐᑐᐃᓐᓀᑦ ᐆᒪᔪᐃᑦ ᐃᓂᖏᓐᓄᑦ ᓴᓂᕐᕙᑕᐅᒪᔪᑦ ᐅᕝᕙᓘᓐᓃᑦ ᐃᒪᕐᒥᐅᑕᓄᑦ ᓴᓂᕐᕙᑕᐅᒪᔪᑦ ᓴᐳᒻᒥᑐᐃᓐᓇᕆᐊᓖᑦ, ᑭᒡᒐᑐᕐᑐᒥᒃ ᐆᒪᔪᐃᑦ ᐃᓂᖏᓐᓂᒃ ᐃᓚᖓᓂ ᐱᐅᔪᐊᓗᔮᖕᖏᑐᓂᒃ ᐆᒪᔪᐃᑦ ᐊᑦᔨᒌᖕᖏᓂᖏᑦ ᑕᑯᓐᓇᓗᒋᑦ ᐅᕝᕙᓘᓐᓃᑦ ᐊᔪᒉᑦᑑᖕᖏᑐᖅ ᓄᓇᖓ. ᑭᓯᐊᓂ, ᐃᓘᓐᓇᑎᒃ ᐆᒪᔪᐃᑦ ᐃᓂᖏᑦ ᐊᒻᒪᓗ ᐃᓗᓕᖏᑦ ᐱᐅᓯᕐᓱᑐᑦ ᐊᕙᑎᒥ, ᑯᐯᒻᒥ ᐱᒋᔭᐅᓲᑐᖃᐅᒐᓗᐊᕈᓂ, ᓱᒃᑯᑕᐅᑎᑕᐅᑦᑌᓕᒋᐊᓕᒃ ᑯᐯᒻᒥ ᐱᓇᓱᐊᕐᑕᐅᔪᓄᑦ ᐃᓚᒋᔭᐅᒋᐊᓕᒃ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ.”
ᓄᓇᕕᒻᒥ, ᐃᓗᕐᖁᓯᖓᓅᓕᖓᔪᖅ ᐃᓚᐅᒋᐊᖃᕐᒥᔪᖅ ᐱᕙᓪᓕᐊᔭᐅᓂᖓᓄᑦ ᓄᐃᑦᓯᓂᖏᓐᓄᑦ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ. ᐃᓚᐅᑎᑕᐅᖃᑕᐅᔪᖅ ᑲᒪᒋᔭᐊᔪᓄᑦ ᐊᒻᒪᓗ ᐱᕙᓪᓕᐊᑎᑕᐅᔪᓃᖃᑕᐅᑦᓱᓂ. ᖃᐅᔨᒋᐊᕐᓂᖅ ᓄᓇᓕᓕᒫᓂ ᐱᓇᓱᐊᖃᑕᐅᔪᑦ ᐱᒻᒪᕆᐅᒻᒥᔪᑦ ᐱᕙᓪᓕᐊᔭᐅᓂᖓᓄᑦ. ᐱᒍᓐᓇᐅᑎᖏᑦ ᐃᓚᐅᔪᑦ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ (JBNQA) ᐊᒻᒪᓗ ᑯᐯᒃ ᑕᕐᕋᖓᑕ ᓯᕿᓂᖓᓂ ᐊᖏᖃᑎᒌᓐᓂᖓ (ᓇᔅᑳᐱᒃᑯᑦ ᐊᖏᖃᑎᒌᓐᓂᖓ) (NEQA) ᐃᑉᐱᒋᔭᐅᔪᑦ ᐊᒻᒪᓗ ᓴᐳᑎᔭᐅᒪᑦᓱᑎᒃ ᓱᒃᑯᑕᐅᑎᑕᐅᑦᑌᓕᔪᓂ ᓄᓇᓂ ᓄᓇᕕᒻᒥ.
ᖃᓄᐃᑦᑐᐃᑦ ᓄᓇᖕᖑᐊᓕᕆᓃᑦ ᐱᓇᓱᐊᕐᑕᐅᓚᖓᕙᑦ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ ᒪᓂᔭᐅᒪᔪᓄᑦ?
ᐃᓕᑕᕆᔭᐅᔪᖅ ᓄᓇᐅᑉ ᐊᑎᖓ ᑐᑭᑖᕐᑕᐅᓛᕐᑐᖅ ᐊᑌᓐᓇᓂᐊᓕᕐᑐᒥᒃ ᓱᒃᑯᑕᐅᑎᑕᐅᑦᑌᓕᓂᕐᒦᑎᑕᐅᓯᑉᐸᑦ ᓄᓇ. ᑐᑭᓯᒪᔭᐅᔪᖅ ᑲᒪᒋᔭᓖᑦ ᑎᒥᐅᔪᑦ ᓄᓇᕕᒻᒥ ᐊᒻᒪᓗ ᓄᓇᓕᓐᓂ ᐊᒻᒪᓗ ᓄᓇᖃᕐᖄᓯᒪᔪᑦ ᐊᑦᑐᑕᐅᒪᔪᑦ ᑖᒃᑯᓄᖓ ᓄᓇᓄᑦ ᐱᑕᖃᕐᑎᓯᓛᕐᑐᑦ ᒪᓂᔨᒍᑎᒥᒃ ᐃᓕᑕᕆᔭᐅᔪᒥᒃ ᓄᓇᖕᖑᐊᒥᒃ ᑲᑎᒪᔨᖏᓐᓄᑦ ᓄᓇᖕᖑᐊᓕᕆᓂᕐᒧᑦ ᑯᐯᒻᒥ. ᑌᒣᓕᓐᓂᒥᔪᑦ ᑲᔪᓯᑦᓯᐊᑐᕕᓂᐅᑦᓱᓂᓗ ᓄᐃᑕᐅᑎᓪᓗᒋᑦ ᑲᓇᑕᒥ ᒥᕐᖑᐃᓯᕐᕖᑦ ᓄᓇᕕᒻᒥ.
ᓱᓇᐅᕚᑦ ᐊᑦᔨᒌᖕᖏᑐᑦ ᓄᓇᒥ ᑲᑎᑯᐊᔨᖏᑦ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ (JBNQA) ᐊᒻᒪᓗ ᑯᐯᒃ ᑕᕐᕋᖓᑕ ᓯᕿᓂᖓᓂ ᐊᖏᖃᑎᒌᓐᓂᖓ (NEQA)?
- ᑲᑎᑯᐊᔨ I ᐊᒻᒪᓗ IB-N -ᓄᓇᖃᕐᖄᓯᒪᔪᑦ ᓄᓇᖁᑎᖓ ᑲᒪᒋᔭᐅᔪᖅ ᐊᒻᒪᓗ ᐊᐅᓚᑕᐅᑦᓱᓂ ᐃᓚᐅᔪᐃᑦ ᐱᕙᓪᓕᖁᑎᑦᓴᕆᔭᖓᓂ ᐊᑐᓂ ᐃᓄᐃᑦ ᓄᓇᓕᓐᓂ ᓄᓇᒥ ᑎᒍᒥᐊᕐᑎᑯᓐᓄ ᐊᒻᒪᓗ ᓇᔅᑳᐱᒃᑯᑦ ᓄᓇᒥ ᑎᒍᒥᐊᕐᑎᖏᓐᓄᑦ, ᑌᒣᒻᒪᑦ; ᐱᒍᓐᓇᐅᑎᖃᕐᖁᑦ, ᐅᖄᔭᐅᔪᓂᒃ ᐊᖏᖃᑎᒌᓐᓂᒥ, ᐃᓚᐅᑎᓪᓗᒋᑦ ᐆᒪᔪᕐᓂᐊᕈᓐᓇᓂᕐᒥᒃ (ᐊᒻᒪᓗ ᐱᒍᓐᓇᐅᑎᖃᕐᓱᑎᒃ ᓄᐃᑦᓯᒍᓐᓇᓂᕐᒥᒃ ᐃᖏᕐᕋᑎᑦᓯᒍᓐᓇᓱᑎᓪᓗ ᒪᙯᕝᕕᒥᒃ)
- ᑲᑎᑯᐊᔨ I ᐊᒻᒪᓗ II-N -ᓄᓀᑦ ᐃᓄᓕᒫᓅᑦ ᑐᕌᖓᔪᐃᑦ ᑲᕙᒪᒃᑯᓄᑦ ᐱᒋᔭᐅᑦᓱᑎᒃ ᐃᓄᐃᑦ, ᑯᔩᒃᑯᓗ ᐊᒻᒪᓗ ᓇᔅᑳᐱᒃᑯᑦ ᐱᒍᓐᓇᐅᑎᖃᕐᕕᖏᑦ, ᑐᑭᖏᓐᓂ ᐊᖏᖃᑎᒌᓐᓂᐅᑉ, ᐃᓚᐅᑎᓪᓗᒋᑦ ᐆᒪᔪᕐᓂᐊᕈᓐᓇᕕᖃᕐᕕᒋᑦᓱᒋᑦ (ᐊᒻᒪᓗ ᐱᒍᓐᓇᐅᑎᖃᕐᓱᑎᒃ ᓄᐃᑦᓯᒍᓐᓇᓂᕐᒥᒃ ᐊᒻᒪᓗ ᐊᐅᓚᑦᓯᒍᓐᓇᓂᕐᒥᒃ ᒪᙯᕝᕕᒥᒃ)
- ᑲᑎᑯᐊᔨ III – ᓄᓀᑦ ᐃᓄᓕᒫᓄᑦ ᑐᕌᖓᔪᑦ ᑲᕙᒪᒃᑯᓄᑦ ᐱᒋᔭᐅᑦᓱᑎᒃ ᐃᓄᐃᑦ, ᑯᔩᒃᑯᓗ ᐊᒻᒪᓗ ᓇᔅᑳᐱᒃᑯᑦ ᐱᒍᓐᓇᐅᑎᖃᕐᕕᖏᑦ, ᑐᑭᖏᓐᓂ ᐊᖏᖃᑎᒌᓐᓂᐅᑉ, ᐃᓚᐅᑎᓪᓗᒋᑦ, ᐃᓚᐅᑎᓪᓗᒋᑦ ᐱᒍᓐᓇᐅᑎᖃᕐᕕᒋᓇᒋᑦ ᐆᒪᔪᕐᓂᐊᕈᓐᓇᓂᕐᒥᒃ. ᐃᓚᒋᐊᕈᑎᐅᑎᓪᓗᒍ, ᒥᑭᒋᐊᕐᓂᐊᕈᓐᓇᓂᖅ ᐱᒍᓐᓇᐅᑎᖃᕐᕕᒋᔭᖓ ᐃᓚᐅᔪᐃᑦ ᐊᖏᖃᑎᒌᓐᓂᒥ.
ᐱᒍᓐᓇᑕᐅᔪᑦ ᐊᒻᒪᓗ ᐱᒍᓐᓇᑎᑕᐅᖕᖏᑐᑦ ᐱᓇᓱᐊᕐᓃᑦ ᓱᒃᑯᑕᐅᑎᑕᐅᑦᑌᓕᔪᓂ ᓄᓇᓂ
ᐱᒍᓐᓇᖏᓐᓇᓚᖓᕗᖔ ᐱᒍᓐᓇᐅᑎᒃᑲᓂᒃ ᐊᑐᕈᓐᓇᓗᖓ, ᒪᙯᓐᓂᒥᒃ, ᐃᖃᓗᓐᓂᐊᓂᕐᒥᒃ ᐊᒻᒪᓗ ᒥᑭᒋᐊᕐᓂᐊᓂᕐᒥᒃ ᓱᒃᑯᑕᐅᑎᑕᐅᑦᑌᓕᔪᓂ ᓄᓇᓂ ᐃᓚᐅᔫᓗᖓ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ (JBNQA) ᐊᒻᒪᓗ ᑯᐯᒃ ᑕᕐᕋᖓᑕ ᓯᕿᓂᖓᓂ ᐊᖏᖃᑎᒌᓐᓂᖓ (NEQA)?
ᐋ. ᐱᒍᓐᓇᐅᑏᑦ ᐊᖏᖃᑎᒌᒍᑎᐅᓯᒪᔪᑦ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᓂ (JBNQA) ᐊᒻᒪᓗ ᑯᐯᒃ ᑕᕐᕋᖓᑕ ᓯᕿᓂᖓᓂ ᐊᖏᖃᑎᒌᓐᓂᖓᓂ (NEQA) ᓯᕗᓪᓕᐊᑎᑕᐅᕗᑦ ᐊᓯᓕᒫᖏᓐᓄᑦ ᐱᖁᔭᓄᑦ ᒪᓕᒐᕐᓄᓘᓐᓃᑦ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ ᓄᓇᕕᒻᒥ:
ᒪᓕᓪᓗᒋᑦ ᐊᕕᑦᑐᓯᒪᔪᑦ 24 JBNQA-ᒥ ᐊᒻᒪᓗ ᐊᕕᑦᑐᓯᒪᔪᑦ 15 NEQA-ᒥ, ᐃᓚᐅᔪᐃᑦ ᐱᒍᓐᓇᐅᑎᓖᑦ ᐆᒪᔪᕐᓂᐊᕈᓐᓇᓂᕐᒥᒃ (ᒪᙯᓐᓂᒥᒃ, ᐃᖃᓗᓐᓂᐊᓂᕐᒥᒃ ᐊᒻᒪᓗ ᒥᑭᒋᐊᕐᓂᐊᓂᕐᒥᒃ) ᑲᑎᕕᐅᑉ ᓄᓇᓕᓕᒫᖓᓂ, ᐃᓚᐅᑎᓪᓗᒋᑦ ᑭᓪᓕᖏᑦ ᐃᒪᕐᒥᐅᑌᑦ ᓴᓂᕐᕙᑕᐅᒪᔪᑦ, ᖃᓄᐃᑦᑐᑐᐃᓀᓐᑦ ᐆᒪᔪᐃᑦ ᐃᓂᖏᑦ ᓴᓂᕐᕙᑕᐅᒪᔪᑦ ᐊᒻᒪᓗ ᓄᓀᑦ ᓴᓂᕐᕙᑕᐅᒪᔪᑦ ᓱᒃᑯᑕᐅᑎᑕᐅᑦᑌᓕᓂᕐᒧᑦ ᐱᑦᔪᑎᖃᕐᓱᑎᒃ.
ᐃᓄᐃᑦ, ᓇᔅᑳᐲᑦ ᐊᒻᒪᓗ ᑯᔩᒃᑯᑦ ᐊᑕᓚᖓᕗᑦ ᐱᒍᓐᓇᐅᑎᖏᑦ ᒪᙯᓐᓂᒥᒃ, ᐃᖃᓗᓐᓂᐊᓂᕐᒥᒃ ᐊᒻᒪᓗ ᒥᑭᒋᐊᕐᓂᐊᓂᕐᒥᒃ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ.
ᓱᓀᑦ ᓱᖃᑦᓯᒍᑏᑦ ᐱᒍᓐᓇᑎᑕᐅᖕᖏᓚᓪᓘᓃᑦ ᒪᓂᔭᐅᒪᔪᓂ ᖃᓄᐃᑦᑐᑐᐃᓐᓇᓄᑦ ᐆᒪᔪᐃᑦ ᐃᓂᖏᓐᓄᑦ ᓴᓂᕐᕙᑕᐅᒪᔪᓄᑦ ᐅᕝᕙᓘᓐᓃᑦ ᒪᓂᔭᐅᒪᔪᓄᑦ ᐃᒪᕐᒥᐅᑕᓄᑦ ᓴᓂᕐᕙᑕᐅᒪᔪᓄᑦ?
ᐱᐅᓯᕐᓱᑐᑦ ᕿᒻᒪᖁᓯᐊᑦ ᑲᒪᒋᔭᐅᓂᖏᑦᑕ ᒪᓕᒐᖏᑦ (NHCA), ᐃᓚᖏᑦ ᓱᖃᑦᓯᒍᑏᑦ JBNQA-ᒥ ᐊᒻᒪᓗ NEQA-ᒃᑯᓂ ᐃᓚᐅᔫᖕᖏᑐᓄᑦ ᐊᑐᕐᑕᐅᒍᓐᓇᑐᑦ, ᐃᓂᕐᑎᕆᐅᑕᐅᒪᔪᑦ ᐊᒻᒪᓗ ᐱᒍᓐᓇᑎᑕᐅᖕᖏᑐᑦ ᐆᒪᔪᐃᑦ ᖃᓄᐃᑦᑐᑐᐃᓐᓀᑦ ᐃᓂᖏᑦᑕ ᓴᓂᕐᕙᑕᐅᒪᕕᖓᓂ (ᐅᕝᕙᓘᓐᓃᑦ ᒪᓂᔭᐅᒪᔪᑦ ᖃᓄᐃᑦᑐᑐᐃᓐᓀᑦ ᐃᓂᖏᑦᑕ ᓴᓂᕐᕙᑕᐅᒪᕕᖓᓂ) ᐅᕝᕙᓘᓐᓃᑦ ᐃᒪᕐᒥᐅᑌᑦ ᓴᓂᕐᕙᑕᐅᒪᔪᑦ (ᐅᕝᕙᓘᓐᓃᑦ ᒪᓂᔭᐅᒪᔪᑦ ᐃᒪᕐᒥᐅᑌᑦ ᓴᓂᕐᕙᑕᐅᒪᔪᑦ). ᓱᖃᑦᓯᒍᑏᑦ ᐊᑐᕐᑕᐅᔪᑦ TRPAP-ᒥ ᐊᖏᕐᑕᐅᒋᐊᓖᑦ MELCC-ᒃᑯᓄᑦ. ᑖᓐᓇ ᑭᖑᓪᓕᐹᒥ ᖃᓄᐃᓕᖓᓂᖓ ᓂᕆᐅᒋᔭᐅᓂᖓᑕ ᒪᓕᓪᓗᒍ ᐊᑐᕐᑕᐅᓚᖓᔪᖅ ᐆᒪᔪᐃᑦ ᖃᓄᐃᑦᑐᑐᐃᓐᓀᑦ ᐃᓂᖏᑦᑕ ᓴᓂᕐᕙᑕᐅᒪᔪᓄᑦ.
ᓱᖃᑦᓯᓂᐅᔪᑦ ᐱᒍᓐᓇᑎᑕᐅᔪᑦ ᐱᒍᓐᓇᑎᑕᐅᖕᖏᑐᓪᓘᓃᑦ ᐃᓚᐅᔫᖕᖏᑐᓄᑦ ᐆᒪᔪᐃᑦ ᖃᓄᐃᑦᑐᑐᐃᓐᓀᑦ ᐃᓂᖏᓐᓂ ᐊᒻᒪᓗ ᐃᒪᕐᒥᐅᑕᓄᑦ ᓴᓂᕐᕙᑕᐅᒪᕕᖏᓐᓂ
| ᐱᓇᓱᑦᑕᐅᔪᖅ | ᐱᕕᓕᒃ /ᐱᕕᖃᖕᖏᑐᖅ |
| ᐱᖕᖑᐊᑐᑦ ᐆᒪᔪᕐᓂᐊᓂᖓ | ᐱᕕᓕᒃ |
| ᐱᖕᖑᐊᑐᑦ ᐃᖃᓗᓐᓂᐊᓂᖓ | ᐱᕕᓕᒃ |
| ᒥᑭᒋᐊᕐᓂᐊᓂᖅ | ᐱᕕᖃᖕᖏᑐᖅ |
| ᐁᒍᓐᓇᓂᖅ ᐊᒻᒪᓗ ᐊᐅᓚᓂᖅ ATV-ᑯᑦ ᐅᕝᕙᓗᓘᓐᓃᑦ ᓯᑭᑐᒃᑯᑦ | ᐱᕕᓕᒃ, ᑭᓯᐊᓂ ᐊᒻᒪᑎᕆᓂᖅ ᓄᑖᓂᒃ ᐊᕐᖁᑎᑦᓴᓂᒃ ᑕᒪᓐᓇ ᐱᑦᔪᑎᒋᓗᒍ ᐱᕕᖃᖕᖏᑐᖅ. |
| ᐁᒍᓐᓇᓂᖅ ᐊᒻᒪᓗ ᐊᐅᓚᓂᖅ ᐅᒥᐊᓄᑦ ᐊᐅᓚᐅᑎᓕᓐᓄᑦ | ᐱᕕᓕᒃ |
| ᕿᑲᕆᐊᕐᓯᒪᓂᖅ ᐱᑕᖃᕇᕐᑐᓂ ᐃᓪᓗᐊᐱᓐᓂ (ᐊᑦᑕᑐᕈᑏᑦ, ᒪᙯᕝᕖᑦ ᐅᕝᕙᓗᓘᓐᓃᑦ ᐃᓪᓗᐊᐲᑦ) | ᐱᕕᓕᒃ |
| ᐊᖏᕐᓂᖅ ᓄᑖᓂᒃ ᓄᓇᒥ ᐱᔪᓐᓇᓂᖃᕈᑎᓂᒃ ᓇᒻᒥᓂᖅ ᐊᑐᕈᓐᓇᓗᓂ (ᕿᑲᕆᐊᕐᓯᒪᓂᖅ, ᒪᑭᑕᑫᓐᓇᑐᑦ ᐃᑎᕐᕕᓭᑦ, ᐊᓯᖏᓪᓗ) | ᐱᕕᖃᖕᖏᑐᖅ |
| ᓄᐊᑦᓯᓂᖅ ᕿᔫᖕᖏᑐᓂᒃ ᓇᐹᕐᑐᓕᓐᓂ ᐱᕈᕐᑐᓂᒃ (ᐸᐅᕐᙰᑦ, ᐊᓄᕆᓯᐅᑏᑦ, ᐊᓯᖏᓪᓗ) | ᐱᕕᓕᒃ |
| ᐃᑯᐊᓚᔪᑦᓴᓂᒃ ᕿᔪᑦᑕᓂᖅ | ᐱᕕᖃᖕᖏᑐᖅ |
| ᓇᐹᕐᑐᓂᐊᕐᓂᖅ | ᐱᕕᖃᖕᖏᑐᖅ |
| ᖃᐅᔨᓴᐅᑏᑦ ᐊᒻᒪᓗ ᐃᓕᓐᓂᐊᓂᖅ | ᐱᕕᓕᒃ |
| ᐅᔭᕋᓐᓂᐊᑦ, ᐅᕐᓱᐊᓗᓐᓂᐊᑦ ᐊᒻᒪᓗ ᐅᕐᓱᕈᑎᑦᓴᓂᐊᑦ ᐱᓇᓱᓐᓂᖏᑦ | ᐱᕕᖃᖕᖏᑐᖅ |
| ᓴᓇᓂᖅ ᐃᒪᕐᒥ ᐃᑯᒪᓕᐅᕈᑎᓂᒃ ᐊᒻᒪᓗ ᓂᐅᕐᕈᑎᑦᓴᒥᒃ ᐃᑯᒪᓕᐅᕐᓂᒥᒃ ᐱᓇᓱᐊᕈᑎᓂᒃ (ᐃᓚᐅᑎᓪᓗᒍ ᐃᑯᒪᐅᑉ ᐊᑦᓱᓈᖓᑕ ᓴᓇᔭᐅᓂᖓ) | ᐱᕕᖃᖕᖏᑐᖅ |
| ᐱᓇᓱᐊᕐᓂᖏᑦ ZEC-ᖑᔪᑦ, ᒪᙯᑦᑎᓯᔩᑦ, ᐊᒻᒪᓗ ᐆᒪᔪᐃᑦ ᐱᐅᓕᒪᕕᖏᑦ | ᐱᕕᓕᒃ |
| ᐱᕈᕐᑐᓴᓕᐅᕐᓂᖅ | ᐱᕕᓕᒃ ᐊᖏᕐᑕᐅᒍᑎᒋᓗᒍ |
| ᐱᕈᕐᑐᓂᒃ ᓂᕿᑦᓴᓂᐊᕐᓂᖅ | ᐱᕕᖃᖕᖏᑐᖅ |
| ᓴᓇᓂᖅ ᓄᑖᓂᒃ ᓇᑉᐸᑎᒐᕐᓂᒃ (ᐃᓪᓗᔪᐊᑦ, ᐊᕐᖁᑎᒻᒪᕇᑦ, ᐊᕐᖁᑎᐊᐲᑦ, ᐊᓯᖏᓐᓗ) | ᐱᕕᓕᒃ ᐊᖏᕐᑕᐅᒍᑎᒋᓗᒍ |
* ᖃᓅᒐᓗᐊᕐᐸᑦ ᐅᐊᕈᑕᐅᔪᑦ ᑖᒃᑯᓇᓂ ᓈᓴᕐᑕᐅᔪᓂ ᑕᐅᕐᓯᐅᑎᒋᐊᖃᖕᖏᑐᑦ ᐱᖁᔭᕐᑎᒍᑦ ᐃᓕᑕᕆᔭᐅᔪᓄᑦ ᐊᓪᓚᓄᑦ (NHCA-ᓂ ᐊᒻᒪᓗ ᐱᐅᓕᒪᑦᓯᓂᕐᒥᒃ ᐸᕐᓇᓯᒪᐅᑎᓂ ᐊᑐᓂ ᖁᒥᐅᑎᒧᑦ).
ᐅᔭᕋᓐᓂᐊᕋᑦᓴᒦᒃ ᐱᖃᕐᓂᕋᕐᑐᖃᕈᓐᓇᖃ, ᐅᔭᕋᓐᓂᐊᕋᑦᓴᓂᒃ ᕿᓂᕐᓂᒥᒃ, ᐅᕝᕙᓘᓐᓃᑦ ᐅᔭᕋᓐᓂᐊᓂᕐᒥᒃ ᓄᓇᓂ ᓴᓂᕐᕙᑕᐅᒪᔪᓂ ᓱᒃᑯᑕᐅᑎᑕᐅᑦᑌᓕᓂᕐᒧᑦ (TRPAP), ᒪᓂᔭᐅᒪᔪᖅ ᐆᒪᔪᐃᑦ ᖃᓄᐃᑦᑐᑐᐃᓐᓀᑦ ᐃᓂᖏᑦᑕ ᓴᓂᕐᕙᑕᐅᒪᔪᑦ (PBR), ᒪᓂᔭᐅᒪᔪᖅ ᐃᒪᕐᒥᐅᑕᓄᑦ ᓴᓂᕐᕙᑕᐅᒪᔪᑦ (PAR), ᐅᕝᕙᓘᓐᓃᑦ ᐆᒪᔪᐃᑦ ᖃᓄᐃᑦᑐᑐᓐᓀᑦ ᐃᓂᖏᑦᑕ ᓴᓂᕐᕙᑕᐅᒪᓂᖓ (BR)?
ᐊᐅᑲ. TRAP, PBR ᐊᒻᒪᓗ PAR-ᒃᑯᓂ, ᓴᐳᒻᒥᓂᕐᒦᑎᑦᓯᓚᐅᕐᑐᓂᖅ ᐱᒍᓐᓇᑎᑦᓯᔪᖅ ᓄᕐᖃᓚᐅᕐᑐᑎᑦᓯᓂᕐᒥᒃ ᐅᔭᕋᓐᓂᐊᕈᓐᓇᑎᑦᓯᓂᕐᒥᒃ ᐊᒻᒪᓗ ᐃᓘᓐᓇᖏᓐᓄᑦ ᐅᔭᕋᓐᓂᐊᕋᑦᓴᓂᒃ ᕿᓂᕐᓂᒥᒃ. ᖃᓄᐃᑦᑐᑐᓐᓀᑦ ᐆᒪᔪᐃᑦ ᐃᓂᖏᑦᑕ ᓴᓂᕐᕙᑕᐅᒪᔪᖏᓐᓂ, ᕿᓂᕐᓃᑦ ᐅᕝᕙᓘᓐᓃᑦ ᐅᔭᕋᓐᓂᐊᓂᕐᒧᑦ ᐱᓇᓱᐊᕐᓃᑦ ᐱᒍᓐᓇᑎᑕᐅᖕᖏᑐᑦ (ᐊᖏᕐᑕᐅᒪᖕᖏᑯᑎᒃ ᑐᕐᖃᑕᕐᕕᒧᑦ).
ᕿᔪᐃᑦ ᓇᑲᑎᕐᑕᐅᒍᓐᓇᖃᑦ ᑭᓪᓕᖏᓐᓂ ᓄᓀᑦ ᓴᓂᕐᕙᑕᐅᒪᔪᑦ ᓱᒃᑯᑕᐅᑎᑕᐅᑦᑌᓕᓂᕐᒧᑦ ᐱᑦᔪᑎᖃᕐᓱᑎᒃ (TRPAP), ᒪᓂᔭᐅᒪᔪᖅ ᖃᓄᐃᑦᑐᑐᓐᓀᑦ ᐆᒪᔪᐃᑦ ᐃᓂᖏᑦᑕ ᓴᓂᕐᕙᑕᐅᒪᔪᖅ (PBR), ᒪᓂᔭᐅᒪᔪᖅ ᐃᒪᕐᒥᐅᑌᑦ ᓴᓂᕐᕙᑕᐅᒪᓂᖓ (PAR), ᐅᕝᕙᓘᓐᓃᑦ ᐆᒪᔪᐃᑦ ᖃᓄᐃᑦᑐᑐᓐᓀᑦ ᐃᓂᖏᑦᑕ ᓴᓂᕐᕙᑕᐅᒪᓂᖓ (BR)?
ᐋ, ᐃᑯᐊᓪᓚᕈᓐᓇᑐᓂᒃ ᕿᔪᑦᓯᐅᓂᖅ ᐃᓂᑦᓴᓕᐅᑫᓐᓇᓂᕐᒧᑦ ᐅᕝᕙᓘᓐᓃᑦ ᒥᑭᒋᐊᕐᓂᐊᓂᕐᒧᑦ ᒪᙯᕝᕕᓂ ᐱᒍᓐᓇᑎᑕᐅᔪᖅ ᐃᓚᒋᔭᐅᑦᓱᓂ ᒪᙯᒍᓐᓇᓂᕐᒧᑦ ᐱᒍᓐᓇᐅᑎᐅᑎᓪᓗᒍ ᐃᓚᐅᔪᓄᑦ ᐊᖏᖃᑎᒌᓐᓂᒥ. ᑭᓯᐊᓂ, ᐃᑯᐊᓪᓚᕈᓐᓇᑐᓂᒃ ᕿᔪᑦᓯᐅᓂᖅ ᐃᓚᐅᔫᖕᖏᑐᓄᑦ ᐱᒍᓐᓇᑎᑕᐅᖕᖏᑐᖅ ᐊᖏᕐᑕᐅᒪᖕᖏᑯᓂ MELCC-ᒃᑯᓄᑦ. ᐃᓚᒋᐊᕈᑎᐅᑎᓪᓗᒍ, ᑮᓇᐅᔭᓕᐅᕋᓱᐊᕐᓂᒧᑦ ᕿᔪᑦᑕᓂᖅ ᐱᒍᓐᓇᐅᑎᑕᐅᖕᖏᑐᖅ.
ᓄᓇᕕᒻᒥ ᓱᒃᑯᑕᐅᑎᑕᐅᑦᑌᓕᔪᓂᒃ ᓄᓇᓂᒃ ᐸᕐᓀᓂᕐᒧᑦ ᐱᕙᓪᓕᐊᔭᐅᓂᖓ
ᓱᒐᒦ ᐊᒻᒪᓗ ᖃᓄᖅ ᐃᓄᐃᑦ, ᓇᔅᑳᐲᓪᓗ ᐊᒻᒪᓗ ᑯᔩᒃᑯᑦ ᖃᐅᔨᒋᐊᕕᐅᒍᓛᕐᑐᑦ?
ᖃᐅᔨᒋᐊᕐᓂᖅ ᐱᒍᓐᓇᑎᑦᓯᓛᕐᑐᖅ ᐃᓄᓐᓂᒃ, ᓇᔅᑳᐱᒃᑯᓂᒃ Kawawachiamach-ᒥ ᐊᒻᒪᓗ ᑯᔩᒃᑯᓂᒃ Whapmagoostui-ᒥ ᑕᑯᓐᓇᑕᖏᓐᓂᒃ ᐅᖄᒍᓐᓇᑎᑦᓯᓗᓂ ᓄᐃᑕᐅᓂᖏᓐᓄᑦ ᓱᒃᑯᑕᐅᑎᑕᐅᑦᑌᓕᔪᑦ, ᐱᕙᓪᓕᐊᔭᐅᓂᖓᓄᑦ ᐱᒍᓐᓇᓯᑎᑦᓯᓯᒪᔪᓄᑦ ᒫᓐᓇᐅᔪᖅ ᓄᐃᓯᒪᔪᓄᑦ, ᐊᒻᒪᓗ ᓱᓕᑦᓯᐊᓂᖏᓐᓄᑦ ᐊᒻᒪᓗ ᑭᒡᒐᑐᕐᓂᖏᓐᓄᑦ ᐱᓇᓱᐊᕐᑕᐅᔪᓂᒃ ᓄᐃᑕᑎᑕᐅᔪᓄᑦ ᖃᕆᑕᐅᔭᑎᒍᑦ ᓄᐃᑕᑎᑦᓯᕕᖓᓂ. ᐃᓄᓕᒫᓂᒃ ᖃᐅᔨᒋᐊᕐᓂᖅ ᐸᕐᓇᑕᐅᒪᔪᖅ ᐊᑑᑎᓚᖓᑎᓪᓗᒍ ᓄᓇᕕᒻᒥ ᓄᓇᓕᖏᓐᓂ ᐅᑭᐊᑦᓴᒥ 2022-ᒥ ᐊᒻᒪᓗ ᐅᑭᐅᒥ 2023-ᒥ, ᓄᕙᓐᓇᔪᐊᖅ ᖃᓄᐃᓕᖓᓂᖓ ᒪᓕᓪᓗᒍ (ᓄᕙᓐᓇᔪᐊᖅ 19).
ᓱᓇᐅᕚ ᐱᓇᓱᐊᕐᑕᖏᑦ ᓄᓇᕕᒻᒥ ᓱᒃᑯᑕᐅᑎᑕᐅᑦᑌᓕᔪᑦ ᓄᓀᑦ ᐱᓇᓱᐊᖃᑎᒌᖏᑦ (PAWG)?
ᒪᓕᑦᑐᖅ ᐃᒣᓗᖁᔨᒍᑎᐅᔪᕕᓂᕐᓂᒃ 2011-2012 ᓄᓇᓕᓐᓂ ᖃᐅᔨᒋᐊᕐᓂᖃᕐᑎᓗᒍ ᓄᐃᑕᐅᓂᖏᓐᓄᑦ ᓄᓇᕕᒻᒥ ᓱᒃᑯᑕᐅᑎᑕᐅᑦᑌᓕᔪᑦ ᓄᓀᑦ ᐱᓇᓱᐊᕐᑕᐅᓂᖏᑦ.
ᓱᓇᐅᕚᑦ ᐱᓇᓱᐊᕐᑕᖏᑦ ᓄᓇᕕᒻᒥ ᓱᒃᑯᑕᐅᑎᑕᐅᑦᑌᓕᔪᑦ ᓄᓀᑦ ᐸᕐᓀᓂᕐᒧᑦ ᐊᔪᖀᒋᐊᕐᓂᒧᑦ ᑲᑎᒪᔨᖏᑦᑕ?
ᐊᔪᖀᒋᐊᕐᓂᒧᑦ ᑲᑎᒪᔩᑦ, ᓄᐃᑕᐅᓯᒪᔪᑦ 2017-ᒥ, ᐃᑉᐱᒋᔭᓖᑦ ᖃᐅᔨᑎᑦᓯᓂᕐᒥᒃ ᑐᓴᐅᒪᔭᐅᒋᐊᓕᓐᓂ ᐊᒻᒪᓗ ᓱᓕᑎᑕᐅᓂᖏᓐᓂᒃ PAWG-ᒃᑯᑦ ᐱᓇᓱᐊᕐᑕᖏᑦ ᓱᒃᑯᑕᐅᑎᑕᐅᑦᑌᓕᔪᓄᑦ ᐸᕐᓀᓂᕐᒧᑦ ᓄᓇᕕᒻᒥ, ᐊᒻᒪᓗ ᐃᑉᐱᒋᔭᖃᕐᓱᑎᒃ ᓄᓇᓕᓕᒫᑦ ᐱᒍᒪᔭᖏᑦ ᑲᒪᒋᔭᐅᑦᓯᐊᒪᖔᑖ ᐊᒻᒪᓗ ᐃᓚᐅᑎᑕᐅᒻᒪᖔᑕ ᑖᑦᓱᒧᖓ ᐱᕙᓪᓕᐊᔭᐅᓂᖓᓄᑦ.
ᑭᓇᒃᑰᕚᑦ ᐃᓚᐅᔪᑦ ᓄᓇᕕᒻᒥ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ ᐱᓇᓱᖃᑎᒌᑦ (PAWG) ᐊᒻᒪᓗ ᐊᔪᖀᒋᐊᕐᑎᐅᓂᕐᒧᑦ ᑲᑎᒪᔨᖏᑦ?
ᓄᓇᕕᒻᒥ PAWG ᐅᑯᓂᖓ ᑭᒡᒐᑐᕐᑎᖃᕐᖁᑦ ᐅᑯᓇᓂ ᑎᒥᐅᔪᓂᒃ ᐱᓯᒪᔪᓂᒃ:
- ᑲᑎᕕᒃ ᓄᓇᓕᓕᒫᑦ ᑲᕙᒪᖓ (KRG)
- ᑐᕐᖃᑕᕐᕕᖓ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑉ ᐊᓯᑦᔨᐸᓪᓂᐊᓂᖓᓄᑦ ᐱᓇᓱᐊᕐᑐᑦ (MELCC)
- ᑐᕐᖃᑕᕐᕕᖓ ᐃᑯᒪᓕᐅᕐᓂᓄᑦ ᐱᐅᓯᕐᓱᑐᑦ ᓄᓇᒥ ᐊᑐᕋᑦᓭᑦ (MERN)
- ᑐᕐᖃᑕᕐᕕᖓ ᓇᐹᕐᑐᐃᑦ ᐆᒪᔪᐃᓪᓗ ᐊᒻᒪᓗ ᒥᕐᖑᐃᓯᕐᕖᑦ (MFFP)
- ᑕᕐᕋᒥ ᐸᕐᓀᓂᕐᒧᑦ ᑎᒥᐅᔪᖅ (SPN)
PAWG ᐊᔪᖀᒋᐊᕐᑏᑦ ᑲᑎᒪᔨᖏᑦ ᐅᑯᓂᖓ ᑭᒡᒐᑐᕐᑎᖃᕐᖁᑦ ᐅᑯᓇᓂ ᑎᒥᐅᔪᓂᒃ ᐱᓯᒪᔪᓂᒃ:
- ᑲᑎᕕᒃ ᓄᓇᓕᓕᒫᑦ ᑲᕙᒪᖓ (KRG)
- ᒪᑭᕝᕕᒃ ᑯᐊᐳᕇᓴᖅ
- ᑯᔩᒃᑯᑦ ᑲᕙᒪᖁᑎᖓ
- ᓇᔅᑳᐱᒃᑯᑦ Kawawachikamach-ᒥ
- ᑐᕐᖃᑕᕐᕕᖓ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑉ ᐊᓯᑦᔨᐸᓪᓂᐊᓂᖓᓄᑦ ᐱᓇᓱᐊᕐᑐᑦ (MELCC
ᐃᓱᐊᓂ ᓱᒃᑯᑕᐅᑎᑕᐅᑦᑌᓕᔪᑦ ᓄᓀᑦ ᓄᐃᑕᐅᓂᖓᑕ ᐱᕙᓪᓕᐊᔭᐅᓂᖓᑕ, ᑐᕐᖃᑕᕐᕕᖓ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑉ ᐊᓯᑦᔨᐸᓪᓂᐊᓂᖓᓄᑦ ᐱᓇᓱᐊᕐᑐᑦ ᓴᓂᕐᕓᕋᔭᕐᖄᑦ ᑮᓇᐅᔭᓂᒃ ᐋᕐᕿᓯᒪᐅᑎᑦᓴᖏᓐᓄᑦ ᐊᒻᒪᓗ ᑲᒪᒋᔭᐅᓂᑦᓴᖓᓄᑦ ᓄᓇᕕᒻᒥ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ?
ᑲᒪᒋᔭᐅᓂᖓ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ ᑲᒪᒋᔭᖓᑕ ᐃᓚᒋᔭᖓ MELCC-ᒃᑯᑦ, ᑮᓇᐅᔭᓄᑦ ᓴᐳᑦᔭᐅᒍᑎᖏᑦ ᕿᒥᕐᕈᔭᐅᒍᓐᓇᑐᑦ ᐱᓇᓱᐊᖃᑕᐅᔪᓄᑦ ᐊᑦᔨᒌᖕᖏᑐᓄᑦ (ᑕᕐᕋᒥ ᐸᕐᓀᓂᕐᒧᑦ ᑯᐊᐳᕇᓴᖓ, ᓄᓇᓕᓕᒫᓂ ᑎᒥᐅᔪᑦ ᐊᓯᖏᓪᓗ.) ᕆᐊᖃᓕᑐᐊᕐᐸᑕ.
ᓱᓇᐅᕚᑦ ᐅᕝᕙᓗ ᓱᓇᐅᓛᕐᖃᑦ ᐊᑦᔨᒌᖕᖏᑐᑦ ᐸᕐᓀᕈᑎᐅᓛᕐᑐᑦ ᐊᑐᓕᕐᑎᑕᐅᓛᕐᑐᑦ ᐊᑐᓂ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ?
ᐃᑉᐱᒋᔭᖃᑦᓯᐊᓂᕐᒧᑦ ᐸᕐᓇᓯᒪᐅᑏᑦ ᐊᓪᓚᑕᐅᓛᕐᑐᑦ ᐊᑐᓂ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ. ᑲᒪᒋᔭᖃᕐᓂᒧᑦ ᐸᕐᓇᓯᒪᐅᑏᑦ ᐋᕐᕿᓱᕐᑕᐅᒍᓐᓇᑐᑦ ᐱᓇᓱᐊᖃᑎᖃᕐᓗᑎᒃ ᐊᑦᔨᒌᖕᖏᑐᓂᒃ ᐱᓇᓱᐊᖃᑕᐅᔪᓂᒃ (ᓄᓇᓕᓐᓂᒃ, ᓄᓇᓕᓕᒫᓂ ᑎᒥᐅᔪᓂᒃ, ᐊᓯᖏᓐᓂᓗ).
ᓱᓇᐅᕚ ᐱᓇᓱᐊᕐᑕᖓ MU Conseils-ᒃᑯᑦ ᖃᐅᔨᒋᐊᕐᓂᐅᑉ ᐱᕙᓪᓕᐊᔭᐅᓂᖓᓂ?
MU Conseils ᑮᓇᐅᔭᓕᐅᕋᓱᐊᕐᑎᐅᕗᖅ Manicouagan-Uapishka ᓯᓚᕐᔪᐊᒥ ᐆᒪᓂᓕᓕᒫᑦ ᐃᓂᖏᑦ ᓄᓇᒥ, ᐃᒪᕐᒥ ᐊᒻᒪᓗ ᐊᓂᕐᓂᖃᕐᕕᒥ ᓴᓂᕐᕙᑕᐅᒪᔪᒥ, ᖄᖏᕐᓂᑯᓕᐅᕐᑎᐅᒐᓂ ᑎᒥᐅᔪᖅ ᑲᒪᒋᔭᖃᕐᓱᓂ UNESCO ᖃᓄᐃᓕᖓᓂᖏᓐᓂ. MU Conseils-ᒃᑯᓐᓂ ᐱᓇᓱᖃᑎᒌᑦ ᐱᑕᖃᕐᑎᓯᔪᑦ ᐃᑲᔪᕐᑎᐅᓂᕐᒥᒃ ᐃᓓᓐᓈᒍᑦ KRG-ᒃᑯᓄᑦ ᐱᕙᓪᓕᐊᓂᖓᓄᑦ ᐃᓄᓕᒫᓂᒃ ᖃᐅᔨᒋᐊᕐᓂᖃᕐᑎᓗᒋᑦ ᓄᓇᕕᐅᑉ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ ᐱᓇᓱᐊᕐᑕᐅᓂᖓᓄᑦ.
ᓱᒃᑯᑕᐅᑎᑕᐅᑦᑌᓕᔪᑦ ᓄᓀᑦ ᖃᓄᐃᓕᖓᓂᖏᑦ
ᓱᓇᐅᕚ ᐊᑦᔨᒌᖕᖏᓂᖏᑦ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ ᐊᒻᒪᓗ ᒪᓂᔭᐅᒪᔪᑦ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ?
ᒪᓂᔭᐅᒪᔪᖅ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ ᒫᓐᓇᓯᐅᑎᐅᑎᓪᓗᒍ ᐋᕐᕿᑕᐅᒪᔪᖅ (ᐊᒥᓱᒐᓚᓐᓂ ᐊᕐᕌᒍᓂ) ᑎᑭᐅᑎᓚᖓᑦᓱᓂ ᐊᑌᓐᓇᑐᒥᒃ ᓱᒃᑯᑕᐅᑎᑕᐅᑦᑌᓕᓂᕐᒨᓛᕐᓱᓂ. ᐱᒍᓐᓇᑎᑦᓯᖏᓐᓃᑦ ᐊᒻᒪᓗ ᐱᒍᓐᓇᑎᑦᓯᓃᑦ ᐊᑦᔨᒋᔭᐅᔪᑦ.
ᓱᓇᐅᕚ ᐊᑦᔨᐅᒌᖕᖏᓂᖏᒃ ᐊᑦᔨᒌᖕᖏᑐᑦ ᐆᒪᔪᐃᑦ ᐃᓂᖏᑦ ᓴᓂᕐᕙᑕᐅᒪᔪᑦ ᐊᒻᒪᓗ ᑲᓇᑕᒥ ᒥᕐᖑᐃᓯᕐᕖᑦ?
ᑯᐯᒻᒥ, ᑲᓇᑕᒥ ᒥᕐᖑᐃᓯᕐᕕᖏᑦ ᐊᒻᒪᓗ ᐊᑦᔨᒌᖕᖏᑐᑦ ᐆᒪᔪᐃᑦ ᐃᓂᖏᑦ ᓴᓂᕐᕙᑕᐅᒪᔪᑦ ᓱᒃᑯᑕᐅᑎᑕᐅᑦᑌᓕᔫᕗᑦ ᐃᓚᐅᑎᑕᐅᔪᑦ IUCN ᑲᑎᑯᐊᔨ II-ᒥ, ᐳᕐᑐᓂᕐᐸᐅᖃᑕᐅᔪᖅ ᓱᒃᑯᑕᐅᑎᑕᐅᑦᑌᓕᔪᓄᑦ.
- ᐊᑦᔨᒌᖕᖏᑐᑦ ᐆᒪᔪᐃᑦ ᐃᓂᖏᑦ ᓴᓂᕐᕙᑕᐅᒪᔪᑦ: ᑯᐯᒻᒥ, ᐊᑦᔨᒌᖕᖏᑐᑦ ᐆᒪᔪᐃᑦ ᐃᓂᖏᑦ ᓴᓂᕐᕙᑕᐅᒪᔪᑦ ᐱᓇᓱᐊᕐᑕᐅᔪᖅ ᑲᒪᒋᔭᐅᕙᓪᓗᓲᑦ ᑐᕐᖃᑕᕐᕕᖓᓄᑦ ᐊᕙᑎᐅᑉ ᐊᒻᒪᓗ ᓯᓚᐅᑉ ᐊᓯᑦᔨᐸᓪᓕᐊᑎᑦᓯᑌᓕᓂᕐᒧᑦ. ᑕᑯᓐᓇᑕᖓ, ᑲᒪᒋᔭᖃᕐᓂᖓᑕ ᑐᕌᒐᓱᐊᕐᑕᖓ, ᐊᒻᒪᓗ ᓱᒃᑯᑕᐅᑦᑌᓕᑎᑦᓯᓂᕐᒧᑦ ᐋᕐᕿᒋᐊᕆᒍᑏᑦ ᐊᓪᓚᑕᐅᒪᔪᑦ ᐃᑉᐱᒋᔭᖃᕐᓂᒧᑦ ᐸᕐᓇᑕᐅᒪᒍᑎᖏᓐᓂ ᐊᑐᓂᑦ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ. ᐊᑦᔨᒌᖕᖏᑐᑦ ᐆᒪᔪᐃᑦ ᐃᓂᖏᑦ ᓴᓂᕐᕙᑕᐅᒪᔪᓄᑦ, ᐃᓕᓐᓂᐊᓂᕐᒧᑦ ᐊᒻᒪᓗ ᓱᖃᑦᓯᓂᕐᒧᑦ ᐱᓇᓱᐊᕐᑕᐅᔪᑦ ᑲᔪᓯᑎᑕᐅᒍᓐᓇᑐᑦ, ᑭᓯᐊᓂ ᑖᒃᑯᐊ ᐱᓇᓱᐊᕐᑕᐅᔪᑦ ᐊᒻᒪᓗ ᑮᓇᐅᔭᕐᑕᓴᖏᑦ ᐱᓇᓱᐊᕐᑕᐅᔪᑦ ᖃᓄᐃᓕᖓᓂᖏᓐᓄᑦ ᐊᐅᓚᑕᐅᔪᖅ ᓄᓇᓕᓐᓂ ᐱᓇᓱᐊᖃᑕᐅᔪᓄᓘᓐᓃᑦ.
- ᑲᓇᑕᒥ ᒥᕐᖑᐃᓯᕐᕖᑦ: ᑲᓇᑕᒥ ᒥᕐᖑᐃᓯᕐᕖᑦ ᐱᓇᓱᐊᕐᑕᔪᑦ ᑯᐯᒻᒥ ᑲᒪᒋᔭᐅᕙᓪᓗᓲᑦ ᑐᕐᖃᑕᕐᕕᖓᓄᑦ ᓇᐹᕐᑐᐃᑦ, ᐆᒪᔪᐃᓪᓗ ᐊᒻᒪᓗ ᒥᕐᖑᐃᓯᕐᕖᑦ. ᓄᐃᑕᐅᒐᒥ, ᑲᓇᑕᒥ ᒥᕐᖑᐃᓯᕐᕖᑦ ᑲᒪᒋᔭᐅᓲᑦ ᓯᓚᒥ ᐃᓂᓕᐅᕐᑕᒪᔪᑦ ᑯᐊᐳᕇᓴᖓᓄᑦ ᑯᐯᒻᒥ (SÉPAQ). ᓄᓇᕕᒻᒥ, ᓴᓇᕐᕈᑎᒃ ᐊᖏᖃᑎᒌᓐᓂᖓ ᓄᐃᔪᕕᓂᐅᑎᓪᓗᒍ 2002-ᒥ, ᓄᐃᑦᓯᓂᕐᒥᒃ ᐱᓇᓱᐊᕐᓂᖅ ᑲᓇᑕᒥ ᒥᕐᖑᐃᓯᕐᕕᓂᒃ ᐱᓇᓱᐊᕐᑕᐅᔪᖅ ᑲᑐᑦᔭᐅᓱᓂ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ (KRG), ᒪᑭᕝᕕᒃ ᑯᐊᐳᕇᓴᒧᑦ ᐊᒻᒪᓗ ᑐᕐᖃᑕᕐᕕᖓᓄᑦ ᓇᐹᕐᑐᐃᑦ, ᐆᒪᔪᐃᓪᓗ ᐊᒻᒪᓗ ᒥᕐᖑᐃᓯᕐᕖᑦ. ᓄᐃᑕᐅᑐᐊᕐᒪᑕ, ᑖᒃᑯᐊ ᑲᓇᑕᒥ ᒥᕐᖑᐃᓯᕐᕖᑦ ᑲᒪᒋᔭᐅᓲᑦ ᓄᓇᕕᒻᒥ ᒥᕐᖑᐃᓯᕐᕕᖏᓐᓄᑦ (ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ). ᑲᓇᑕᐅᑉ ᒥᕐᖑᐃᓯᕐᕕᖏᓐᓂ “ᓄᓀᑦ ᑯᐯᒻᒦᑐᑦ ᐱᐅᓯᕐᓱᑐᑦ ᓄᓇᐅᑉ ᖃᓄᐃᑦᑑᓂᖏᑦ ᐊᒻᒪᓗ ᐊᑦᔨᐅᖏᑦᑐᑦ ᐱᐅᓯᕐᓱᑐᑦ ᓄᓀᑦ ᓱᒃᑯᑕᐅᑎᑕᐅᑦᑌᓕᔪᑦ […] ᐊᒻᒪᓗ ᐱᐅᓯᒋᐊᕐᑎᑕᐅᒪᑦᓱᑎᒃ.” ᑲᕙᒪᒃᑯᑦ ᑮᓇᐅᔭᖃᕐᑎᓯᒍᑎᖏᑦ ᐃᓚᐅᑎᑕᐅᔪᑦ ᐱᑕᖃᕐᑎᓯᒋᐊᖃᕐᓂᖏᓐᓄᑦ ᐋᕐᕿᓱᕐᑕᐅᒪᒍᑎᖏᓐᓂᒃ (ᑐᖕᖓᓱᑦᑎᓯᕕᖏᑦ, ᐊᕐᖁᑏᑦ, ᐊᓯᖏᓪᓗ), ᐱᕙᓪᓕᐊᔭᐅᓂᖏᑦ (ᐊᕐᖁᓯᐅᕐᓃᑦ, ᓇᓗᓀᒃᑯᑌᑦ, ᐊᓯᖏᓪᓗ), ᓱᖃᑦᓯᒍᑏᑦ (ᐆᑦᑐᑎᒋᓗᒍ ᐅᒥᐊᕐᓂᒃ ᐊᑦᑕᑐᕐᓂᖅ), ᐃᓕᓐᓂᐊᓂᕐᒧᑦ ᐱᓇᓱᐊᕈᑏᑦ (ᑐᑭᓯᑎᑦᓯᓂᕐᒧᑦ, ᐃᓕᓐᓂᐊᕕᓐᓂ ᐳᓛᕆᐊᕐᑕᓂᖏᑦ, ᐊᓯᖏᓪᓗ).
ᓱᓇᐅᕚ ᓄᓀᑦ ᓴᓂᕐᕙᑕᐅᒪᔪᑦ ᓱᒃᑯᑕᐅᑎᑕᐅᑎᑦᓯᑌᓕᓂᕐᒥᒃ ᓄᓇᓂᒃ ᐱᑦᔪᑎᖃᕐᓱᑎᒃ (TRPAP)?
ᓄᓇ ᓱᒃᑯᑕᐅᑎᑕᐅᑦᑌᓕᓂᕐᒦᓚᐅᕐᑐᑐᖅ, ᐃᓚᐅᑎᑦᓯᔪᖅ ᓄᕐᖃᑎᑦᓯᓂᕐᒥᒃ ᐱᒍᓐᓇᐅᑎᑖᕐᑎᓯᓂᕐᒥᒃ ᐅᔭᕋᓐᓂᐊᕈᓐᓇᓂᕐᒥᒃ ᐊᒻᒪᓗ ᐊᓯᖏᓐᓂᒃ ᐊᖏᕈᑎᓂᒃ ᐅᔭᕋᓐᓂᐊᓂᕐᒧᑦ ᖃᐅᔨᓴᕐᓂᒥᒃ. ᓄᕐᖃᑎᑦᓯᓂᖅ ᐃᓘᓐᓇᖏᓐᓂᒃ ᐃᑯᒪᓕᕆᓂᕐᒧᑦ ᐊᒻᒪᓗ ᓇᐹᕐᑐᓂᐊᓂᕐᒧᑦ ᐱᕙᓪᓕᐊᑎᑦᓯᒍᑎᓂᒃ ᐊᑐᕐᑎᑕᐅᒻᒥᔪᑦ ᑖᒃᑯᓄᖓ ᓄᓇᓄᑦ. ᓄᓇᕕᒻᒥ, ᑕᑯᓐᓇᑕᐅᔪᖅ ᐃᓘᓐᓇᑎᒃ TRPAP ᐱᒍᓐᓇᓯᕋᔭᕐᓂᖏᑦ ᐊᑌᓐᓇᑐᒥᒃ ᖃᓄᐃᑦᑐᑐᐃᓐᓇᓄᑦ ᐆᒪᔪᓄᑦ ᐃᓂᒋᔭᐅᔪᑦ ᓴᓂᕐᕙᑕᐅᒪᓂᕐᒥᒃ.
ᓱᓇᐅᕚ ᒪᓂᔭᐅᒪᔪᖅ ᐊᑦᔨᒌᖕᖏᑐᓄᑦ ᐆᒪᔪᓄᑦ ᐃᓂᒋᔭᐅᔪᑦ ᓴᓂᕐᕙᑕᐅᒪᓂᖓ?
ᑖᓐᓇ ᐋᕐᕿᑕᐅᓯᒪᓂᕐᒦᓚᐅᕐᑐᑎᑦᓯᒍᑎ (ᐊᕐᕌᒍᕐᓂ ᐊᒥᓱᒐᓚᓐᓂ) ᐊᑌᓐᓇᓂᕐᒨᕋᔭᕐᓱᓂ ᓱᒃᑯᑕᐅᑎᑕᐅᑦᑌᓕᓂᕐᒧᑦ ᐊᑦᔨᒌᖕᖏᑐᑦ ᐆᒪᔪᐃᑦ ᐃᓂᒋᔭᐅᔪᑦ ᓴᓂᕐᕙᑕᐅᒪᓂᖓᓄᑦ. ᐅᑯᐊᖑᓗᐊᖕᖑᐊᑐᑦ ᐱᓇᓱᐊᕐᓃᑦ ᐱᒍᓐᓇᑎᑕᐅᖕᖏᑐᑦ ᓄᓇᓂ ᒪᓂᔭᐅᒪᔪᓂ ᐊᑦᔨᒌᖕᖏᑐᑦ ᐆᒪᔪᐃᑦ ᐃᓂᒋᔭᐅᔪᑦ ᓴᓂᕐᕙᑕᐅᒪᓂᖓᓄᑦ:
- ᐅᔭᕋᓐᓂᐊᓃᑦ, ᐅᕐᓱᐊᓗᓐᓂᐊᓂᖅ, ᐅᕐᓱᓂᐊᕐᓂᒧᓪᓗ ᐱᓇᓱᐊᕐᓃᑦ;
- ᓇᐹᕐᑐᓂᐊᕐᓂᒧᑦ ᐱᕙᓪᓕᐊᓂᕐᒧᑦ ᐱᓇᓱᐊᕐᓃᑦ ᐊᕕᑦᑐᓯᒪᔫᑉ 4 ᑐᑭᖓᑎᒍᑦ ᑲᔪᓯᑎᑦᓯᓂᕐᒧᑦ ᓇᐹᕐᑐᓕᕆᓂᕐᒧᑦ ᐱᕙᓪᓕᐊᑎᑕᐅᓂᖓᓄᑦ ᐱᖁᔭᖅ (ᒪᑉᐱᕋᖅ A-18.1);
- ᐊᑐᕐᓂᒥᒃ ᐃᑯᒪᓕᐅᕈᑎᓂᒃ ᐊᓯᖏᓐᓂᓘᓐᓃᑦ ᑮᓇᐅᔭᓕᐅᕋᓱᐊᕐᓂᒨᓕᖓᔪᓂᒃ ᐅᕝᕙᓘᓐᓃᑦ ᓴᓇᓂᕐᓄᑦ ᐃᑯᒪᓕᐅᕐᓂᒥᒃ.
ᓱᓇᐅᕚ ᐊᑦᔨᒌᖕᖏᑐᓄᑦ ᐆᒪᔪᓄᑦ ᐃᓂᒋᔭᐅᔪᑦ ᓴᓂᕐᕙᑕᐅᒪᓂᖓ?
ᐊᑦᔨᒌᖕᖏᑐᓄᑦ ᐆᒪᔪᓄᑦ ᐃᓂᒋᔭᐅᔪᑦ ᓴᓂᕐᕙᑕᐅᒪᓂᖓ ᑲᑎᑯᐊᔨ II-ᖑᑦᓱᓂ ᓱᒃᑯᑕᐅᑎᑕᐅᑦᑌᓕᔪᑦ ᓄᓇᓄᑦ (IUCN) ᐃᑉᐱᒋᔭᖃᕐᓱᑎᒃ ᓴᐳᑦᔭᐅᓂᖏᓐᓄᑦ ᐱᐅᓯᕐᓱᑐᓂᒃ ᐊᕙᑎᒥ ᐊᒻᒪᓗ ᐊᑦᔨᒌᖕᖏᑐᑦ ᐆᒪᔪᐃᑦ ᐃᓂᒋᔭᐅᔪᑦ (ᐆᒪᔪᓕᒫᒃ ᐊᒻᒪᓗ ᐱᕈᕐᑐᓕᒫᑦ) ᐃᓗᓕᖏᑦ. ᑖᓐᓇ ᖃᓄᐃᓕᖓᓂᐅᔪᖅ ᐃᑲᔪᕐᓯᔪᖅ ᑯᐯᒻᒥ ᐱᓇᓱᐊᕐᑕᐅᔪᓂᒃ ᓄᐃᑕᑎᑦᓯᓱᓂ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ ᐊᒻᒪᓗ ᑐᕌᒐᖃᕐᓱᓂ ᓴᐳᑦᔨᓚᖓᓂᕐᒥᒃ ᐱᐅᓯᖏᓐᓂᒃ ᐊᑦᔨᒌᖕᖏᑐᑦ ᐱᐅᓯᕐᓱᑐᑦ ᐊᕙᑎᖓᓂᒃ ᑯᐯᒻᒥ.
ᐋᕐᕿᒋᐊᕆᒍᑎ ᐱᐅᓯᕐᓱᑐᓂᒃ ᕿᒻᒪᖁᓯᐊᓂᒃ ᑲᒪᒋᔭᖃᑦᓯᐊᓂᕐᒧᑦ ᐱᖁᔭᖅ (NHCA) 2021-ᒥ, ᐃᒪᕐᒥᐅᑌᑦ ᓴᓂᕐᕙᑕᐅᒪᓂᖏᓐᓃᑐᑦ ᓄᐃᑕᓛᕈᓐᓀᑐᑦ ᓄᑖᓄᑦ ᑲᒪᒋᔭᐅᔪᓄᑦ ᓄᓇᓄᑦ ᐃᓚᐅᑎᑕᐅᓛᓕᕐᑐᑦ ᐊᑦᔨᒌᖕᖏᑐᓄᑦ ᐆᒪᔪᐃᓄᑦ ᐃᓂᒋᔭᐅᔪᑦ ᓴᓂᕐᕙᑕᐅᒪᓂᖓᓃᑦᑐᓄ.
ᐊᐱᕆᐅᑏᑦ ᑌᒃᑯᓄᖓᓪᓗᑐᐊᐱᒃ
ᖃᓅᖅ ᐃᓱᖃᕐᖃᑦ ᐊᑐᓂ ᓄᓀᑦ ᑎᒡᒍᐊᑕᐅᓯᒪᔪᑦ?
Answer to come.
ᓱᓇᐅᕚ ᐆᒪᔪᐃᑦ ᓇᔪᒐᖏᑦᑕ ᓯᓚᑎᖏᑦᑕᓗ ᖃᐅᔨᒋᐊᕐᕕᓴᖓ ᐋᕐᕿᓱᕐᓯᒪᓂᖓᑕ?
ᑯᐯᒻᒥ ᐆᒪᔪᐃᑦ ᓇᔪᒐᖏᑦᑕ ᓯᓚᑎᖏᑦᑕᓗ ᖃᐅᔨᓴᕈᑎᖓ ᐋᕐᕿᓱᕐᓯᒪᓂᖓᑕ ᓄᓇᖕᖑᐊᓕᐅᕈᑎ “ᐆᒪᔪᐃᑦ ᓇᔪᒐᖏᑦᑕ ᓯᓚᑎᖏᑦᑕᓗ ᓇᓪᓕᐊᓃᓐᓂᖓ ᓄᓇᖓᑕ ᐊᕕᑦᑐᓯᒪᓂᖏᓐᓂ”. ᐳᕐᑐᓂᖓ I (ᐱᐅᓯᕐᓱᑐᑦ ᓄᓀᑦ ᐊᕕᑦᑐᓯᒪᓂᖏᑦ) ᑐᑭᓯᓇᕐᑎᑕᐅᕗᖅ ᓄᓇᓕᕆᓂᕐᒧᕙᓪᓗᖅ (ᓄᓇ) ᐊᒻᒪᓗ ᐃᒪᓕᕆᓂᖅ (ᑕᓰᑦ ᐊᒻᒪᓗ ᑰᑦ). 13-ᓂᒃ ᐱᐅᓯᕐᓱᑐᓂᒃ ᐊᕕᑦᑐᓯᒪᓂᓕᒃ ᑯᐯᒻᒥ, 5 ᓄᓇᕕᒻᒦᑐᑦ. ᐳᕐᑐᓂᖓ II (ᐱᐅᓯᕐᓱᑐᑦ ᓄᓀᑦ) ᑐᑭᓯᓇᕐᑎᑕᐅᒻᒥᔪᖅ ᓄᓇᓕᕆᓂᕐᑎᒍᑦ. 80-ᓂᒃ ᐳᕐᑐᓂᓖᑦ II ᑯᐯᒻᒥ, 27 ᓄᓇᕕᒻᒦᕙᓪᓗᑐᑦ.
ᐊᕙᑎᓕᕆᓃᖅ ᐊᒻᒪᓗ ᐃᓅᖃᑎᒌᑦ ᓱᕐᕋᑕᐅᓂᕐᒧᑦ ᖃᐅᔨᓴᕐᓂᖃᕆᐊᖃᕐᖃᑦ ᐊᑌᓐᓇᓚᖓᔪᒧᑦ ᓱᒃᑯᑕᐅᑎᑕᐅᑦᑌᓕᔪᑦ ᒪᓂᔭᐅᒪᓂᖓᓄᑦ ᓄᓀᑦ ᐊᒻᒪᓗ ᓴᓂᕐᕙᑕᐅᒪᔪᓄᑦ ᓄᓇᓄᑦ?
ᐋ, ᓱᕐᕋᑕᐅᓂᕐᒧᑦ ᖃᐅᔨᓴᕐᓂᖃᕆᐊᖃᓛᕐᑐᑦ ᐱᔭᕇᕐᑎᓯᓂᕐᒧᑦ ᐊᑌᓐᓀᑐᓕᐊᖑᓂᖓᓄᑦ ᓴᓂᕐᕙᑕᐅᓂᖏᓐᓄᑦ ᓱᒃᑯᑕᐅᑎᑕᐅᑦᑌᓕᔪᑦ ᓄᓀᑦ ᓄᓇᕕᒻᒥ, ᐅᖃᕐᑕᐅᔪᑦ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᓂ (JBNQA).
ᖃᓅᖅ ᓄᐃᑕᐅᓯᒪᓂᖓ ᒥᕐᖑᐃᓯᕐᕖᑦ ᑲᓇᑕᒥ ᐅᓕᑦᑕᓂᐅᔭᓕᒃ ᐊᑦᔨᒋᔭᐅᖕᖏᓚᖅ ᑲᖏᕐᓱᐊᓗᑦᔪᐊ ᑰᖓᓄᑦ ᓴᓂᕐᕙᑕᐅᒪᔪᖅ ᓱᒃᑯᑕᐅᑎᑕᐅᑦᑌᓕᔪᒥ ᐱᑦᔪᑎᖃᕐᓱᓂ (ᓄᓇᖓ ᓴᓂᕐᕙᑕᐅᒪᔪᖅ ᐱᑦᔪᑎᖃᕐᓱᓂ ᓱᒃᑯᑕᐅᑎᑕᐅᑦᑌᓕᓂᕐᒧᑦ ᑲᖏᕐᓱᐊᓗᑦᔪᐊᑉ ᑰᖓ) ᐊᒻᒪᓗ ᑲᖏᕐᓱᐊᓗᑦᔪᐊᑉ ᑰᖓᑕ ᑕᕐᕋᖓᓂ ᓴᓂᕐᕙᑕᐅᒪᔪᖅ ᓱᒃᑯᑕᐅᑎᑕᐅᑦᑌᓕᓂᕐᒧᑦ ᐱᑦᔪᑎᖃᕐᓱᓂ (ᓄᓇᖓ ᓴᓂᕐᕙᑕᐅᒪᔪᖅ ᐱᑦᔪᑎᖃᕐᓱᓂ ᓱᒃᑯᑕᐅᑎᑕᐅᑦᑌᓕᓂᕐᒧᑦ ᑲᖏᕐᓱᐊᓗᑦᔪᐊᑉ ᑕᕐᕋᖓᓂ ᑰᖓ)?
ᒥᕐᖑᐃᓯᕐᕖᑦ ᑲᓇᑕᒥ ᐅᓕᑦᑕᓂᐅᔭᓕᒃ ᑲᒪᒋᔭᐅᔪᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᓄᓇᕕᒻᒥ ᒥᕐᖑᐃᕐᓯᕐᕕᖏᓐᓄᑦ. ᑲᖏᕐᓱᐊᓗᑦᔪᐊ ᑰᖓᓄᑦ ᓴᓂᕐᕙᑕᐅᒪᔪᖅ ᓱᒃᑯᑕᐅᑎᑕᐅᑦᑌᓕᔪᒥ ᐱᑦᔪᑎᖃᕐᓱᓂ (ᓄᓇᖓ ᓴᓂᕐᕙᑕᐅᒪᔪᖅ ᐱᑦᔪᑎᖃᕐᓱᓂ ᓱᒃᑯᑕᐅᑎᑕᐅᑦᑌᓕᓂᕐᒧᑦ ᑲᖏᕐᓱᐊᓗᑦᔪᐊᑉ ᑰᖓ) ᐊᒻᒪᓗ
ᑲᖏᕐᓱᐊᓗᑦᔪᐊᑉ ᑰᖓᑕ ᑕᕐᕋᖓᓂ ᓴᓂᕐᕙᑕᐅᒪᔪᖅ ᓱᒃᑯᑕᐅᑎᑕᐅᑦᑌᓕᓂᕐᒧᑦ ᐱᑦᔪᑎᖃᕐᓱᓂ (ᓄᓇᖓ ᓴᓂᕐᕙᑕᐅᒪᔪᖅ ᐱᑦᔪᑎᖃᕐᓱᓂ ᓱᒃᑯᑕᐅᑎᑕᐅᑦᑌᓕᓂᕐᒧᑦ ᑲᖏᕐᓱᐊᓗᑦᔪᐊᑉ ᑕᕐᕋᖓᓂ ᑰᖓ) ᐱᔭᕇᕐᑎᓯᓚᖓᔪᖅ ᓄᓇᕕᒻᒥ ᓱᒃᑯᑕᐅᑎᑕᐅᑦᑌᓕᔪᑦ ᓄᓀᑦ ᐱᓇᓱᐊᕐᑕᖏᓐᓂᒃ ᐊᒻᒪᓗ ᐱᑐᑦᑎᓯᓗᓂ ᑲᒪᑦᓯᐊᓂᕐᒧᑦ ᐱᓇᓱᐊᕈᑎᐅᔪᓂᒃ ᒥᕐᖑᐃᓯᕐᕕᖏᓐᓂ ᑲᓇᑕᐅᑉ. ᑖᒃᑯᐊ TRPAP-ᒃᑯᑦ ᐱᒍᓐᓇᓯᓛᕐᑐᑦ ᐊᑌᓐᓇᑐᒥᒃ ᐆᒪᔪᐃᑦ ᐊᑦᔨᒌᖕᖏᑐᑦ ᐃᓂᖏᑦᑕ ᓴᓂᕐᕙᑕᐅᒪᔪᒥᓐᓂᒥᒃ ᐊᑦᔨᒋᖕᖏᑕᖓᓂᒃ ᑲᓇᑕᒥ ᒥᕐᖑᐃᓯᕐᕕᖏᑦᑕ ᖃᓄᐃᑦᑑᓂᖏᓐᓂᒃ.
ᓱᒐᒦᒃ ᑭᓪᓕᖏᑦ ᑰᕕᐅᑉ ᑰᖓᑕ ᒪᓂᔭᐅᒪᔪᑦ ᐃᒪᕐᒥᐅᑌᑦ ᓴᓂᕐᕙᑕᐅᒪᓂᕐᒧᑦ (ᓴᓂᕐᕙᑕᐅᒪᔪᖅ ᐃᒪᕐᒥᐅᑌᑦ ᓱᒃᑯᑕᐅᑎᑕᐅᑦᑌᓕᓂᕐᒧᑦ ᑰᕕᐅᑉ ᑰᖓ) ᐃᓚᐅᑎᑕᐅᖕᖏᑐᖅ ᕿᑭᕐᑕᓄᑦ ᐊᒻᒪᓗ ᓄᓇᓄᑦ ᓂᒡᒋᖏᓐᓃᑐᓄᑦ ᓯᑦᔭᖓᓂ?
ᓄᐃᑦᓯᓂᖅ ᑭᓪᓕᖃᕐᕕᖏᓐᓂᒃ ᑰᕕᐅᑉ ᑰᖓᑕ ᒪᓂᔭᐅᒪᔪᑦ ᐃᒪᕐᒥᐅᑌᑦ ᓴᓂᕐᕙᑕᐅᒪᔪᒥᒃ (ᓴᓂᕐᕙᑕᐅᒪᔪᖅ ᐃᒪᕐᒥᐅᑌᑦ ᓱᒃᑯᑕᐅᑎᑕᐅᑦᑌᓕᓂᕐᒧᑦ ᑰᕕᐅᑉ ᑰᖓ) ᐱᔭᕆᐊᑐᔫᓚᐅᕐᑐᖅ ᐱᑦᔪᑎᖃᕐᓱᓂ ᑯᐯᒻᒥ ᑐᑭᓯᓇᕐᑎᓯᒍᑎᖏᓐᓄᑦ ᓯᑦᔭᖏᑦᑕ ᐊᒻᒪᓗ ᐃᒪᕐᒥᐅᑌᑦ ᑭᓪᓕᖏᑦᑕ ᒥᑦᓵᓄᑦ, ᑐᑭᓯᓇᕐᑎᑕᐅᓯᒪᔪᑦ ᐊᑦᔨᒋᖕᖏᑕᖏᓐᓂᒃ ᐊᑦᔨᒌᖕᖏᑐᓄᑦ ᑎᒥᐅᔪᓄᑦ ᐊᒻᒪᓗ ᑖᒃᑯᓄᖕᖓᓕᖓᔪᓄᑦ ᓄᓇᒥ ᐃᓐᓄᐃᓯᒪᓂᕐᒧᑦ ᐊᖏᖃᑎᒌᒍᑎᖓᓄᑦ. ᐊᖏᖃᑦᑕᐅᑎᑦᓴᕋᑕᕐᓯᒪᔫᒃ ᑲᕙᒪᖓ ᑯᐯᒃᑯᑦ ᐊᒻᒪᓗ ᒪᑭᕝᕕᒃ ᑯᐊᐳᕇᓴᒃᑯᑦ ᑭᓪᓕᖏᓐᓄᑦ ᑰᕕᐅᑉ ᑰᖓᑕ ᒪᓂᔭᐅᒪᔪᑦ ᐃᒪᕐᒥᐅᑌᑦ ᓴᓂᕐᕙᑕᐅᒪᔪᒥᒃ (ᓴᓂᕐᕙᑕᐅᒪᔪᖅ ᐃᒪᕐᒥᐅᑌᑦ ᓱᒃᑯᑕᐅᑎᑕᐅᑦᑌᓕᓂᕐᒧᑦ ᑰᕕᐅᑉ ᑰᖓ). ᑭᓪᓕᖓ ᐋᕐᕿᑕᐅᓯᒪᔪᖅ ᓄᓇᐸᓯᖓᓄᒋᐊᖅ, ᓴᐴᓗᑕᖃᕐᓱᓂ ᑲᓂᖕᖏᓂᓕᒻᒥᒃ 50 ᒦᑕᓂᒃ ᑫᕙᓪᓚᓱᓂ ᓯᑦᔭᖓᓂ.
ᓱᓇᐅᕚ ᑕᓯᖓ Cambrien ᐊᒻᒪᓗ ᑕᓯᖓ Nachicapau ᓄᓇᖓᓄᑦ ᐊᖏᖃᑎᒌᒍᑎ?
ᐊᖏᖃᑎᒌᓐᓂᖏᑦ ᓇᔅᑳᐱᒃᑯᑦ Kawawachikamach-ᒥ, ᒪᑭᕝᕕᒃ ᑯᐊᐳᕇᓴᒃᑯᑦ, ᐃᑯᒪᓐᓂᐊᑎᒃᑯᖏᑦ ᑯᐯᒻᒥ ᐊᒻᒪᓗ ᑲᕙᒪᖓ ᑯᐯᒃᑯᓂ ᑎᑭᐅᑎᑎᑦᓯᓯᒪᕗᖅ ᐊᑎᓕᕐᐅᓂᖏᓐᓂᒃ ᑖᑦᓱᒪᖓᓕᖓᔪᒥᒃ ᐊᖏᖃᑎᒌᓐᓂᒥᒃ 2018-ᒥ ᑲᒪᒋᔭᐅᑦᓯᐊᓂᖓᓅᓕᖓᔪᒥᒃ ᑖᑦᓱᒧᖓ ᓄᓇᖓᓄᑦ. ᑕᑯᒋᐊᕐᓗᒋᑦ ᓱᓕᔪᓂᒃ ᐊᓪᓚᓯᒪᔪᑦ ᑖᑦᓱᒪ ᐊᖏᖃᑎᒌᓐᓂᐅᑉ ᒥᑦᓵᓄᑦ ᖃᐅᔨᒋᐊᓪᓛᕈᒪᒍᕕᑦ.