ᓴᐳᒻᒥᔭᐅᔪᑦ ᓄᓀᑦ ᐃᓕᑕᕆᔭᐅᓂᖏᑦ
ᓄᓇᕕᒻᒥ, ᓴᐳᒻᒥᔭᐅᔪᑦ ᓄᓀᑦ ᑕᖏᖃᕐᑎᑕᐅᕗᑦ ᓄᓇᕐᔪᐊᑉ ᒥᕐᖑᐃᓯᕐᕕᖏᓐᓄᑦ, ᓄᓇᕐᔪᐊᑉ ᒥᕐᖑᐃᓯᕐᕕᓴᖏᓐᓄᑦ ᖁᒥᐅᑎᓄᑦ, ᑫᒥᑕᐅᓯᒪᔪᓄᑦ ᐊᑦᔨᒋᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑎᓄᑦ, ᐊᑕᐅᓯᕐᒧᑦ ᑫᒥᑕᐅᓯᒪᔪᒧᑦ ᐃᒪᕐᒥᐅᑕᓂᒃ ᖁᒥᐅᑎᒧᑦ, ᐊᒻᒪᓗ ᓄᓇᖁᑎᒥ ᖁᒥᐅᑎᓄᑦ ᐱᑦᔪᑎᓕᓐᓄᑦ ᓴᐳᒻᒥᔭᐅᔪᒥᒃ ᓄᓇᖃᕐᓂᒥᒃ. ᑖᒃᑯᐊ ᒪᓕᑦᑐᑦ ᑳᑎᑰᔨ II-ᒥ ᓴᐳᒻᒥᔭᐅᔪᑦ ᓄᓇᖏᓐᓂᒃ ᑐᓴᕐᓱᓂ International Union for Conservation of Nature (IUCN), ᓴᐳᒻᒥᔭᐅᒍᑏᑦ ᐳᕐᑐᓂᕐᐹᑦ ᐃᓚᖓᓐᓄᑦ. ᓴᐳᒻᒥᔭᐅᔪᑦ ᓄᓀᑦ ᐊᓱᐃᓛᒃ ᓱᕐᖁᐃᕈᑕᐅᕗᑦ ᓴᐳᒻᒥᓯᓂᕐᒥᒃ ᓄᓇᓂᒃ ᐆᑦᑑᑎᑦᓯᐊᓂᒃ ᐆᒪᕕᓐᓄᑦ ᐊᒻᒪᓗ ᐃᓗᕐᖁᓯᕆᔭᐅᔪᓄᑦ ᑕᒪᑐᒧᖓ ᓄᓇᒧᑦ ᐊᑦᑐᐊᔪᓄᑦ.
ᒪᓂᔭᐅᒪᔪᑦ ᖃᓄᐃᑦᑐᑐᐃᓐᓀᑦ ᐆᒪᔪᐃᑦ ᐃᓂᖏᑦ ᓴᓂᕐᕙᑕᐅᒪᔪᑦ ᐊᒻᒪᓗ ᒪᓂᔭᐅᒪᔪᑦ ᐃᒪᕐᒥᐅᑌᑦ ᓴᓂᕐᕙᑕᐅᒪᔪᑦ
ᑯᐯᒻᒥ, ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑏᑦ ᐃᒪᕐᒥᐅᑕᓂᓪᓗ ᖁᒥᐅᑏᑦ ᐃᓘᓐᓈᒍᑦ ᐊᐅᓚᑕᐅᓲᖑᕗᑦ ᑐᕐᖃᑕᕐᕕᑯᓐᓄᑦ ᐊᕙᑎᓕᕆᓂᕐᒧᑦ ᐊᒻᒪᓗ ᐊᑭᒪᑦᔭᓂᕐᒧᑦ ᓯᓚᐅᑉ ᐊᓯᑦᔨᐸᓪᓕᐊᓂᖓᓂᒃ (MELCC). ᐱᑦᔪᑎᖓ ᐊᒻᒪᓗ ᓴᐳᒻᒥᔭᐅᒍᑎᖏᑦ ᓇᓗᓀᕐᑕᐅᔪᑦ ᐱᐅᓕᒪᑦᓯᒍᑎᓂᒃ ᐸᕐᓇᓯᒪᐅᑎᖓᓂ. ᐃᓕᓐᓂᐊᓂᕐᒥᒃ ᐅᕝᕙᓗᓘᓐᓃᑦ ᓱᖃᑦᓯᒍᑎᒥᒃ ᐱᓇᓱᐊᕈᑕᐅᔪᑦ ᑲᔪᓯᑎᑕᐅᒍᓐᓇᑐᑦ, ᑭᓯᐊᓂ ᑕᒪᒃᑯᐊ ᐱᓇᓱᐊᑦᓭᑦ ᐊᑦᑐᐊᔨᖏᓪᓗ ᑮᓇᐅᔭᑎᒍᑦ ᑐᕌᒉᑦ ᐱᒍᓪᓕᐅᔪᑦ ᐱᒋᐊᕐᑎᑕᖏᓐᓂᒃ ᓄᓇᓖᑦ ᐅᕝᕙᓗᓘᓐᓃᑦ ᐊᑦᑐᐊᔭᐅᔪᑦ.
ᓄᓇᕕᒻᒥ, ᐱᖕᖑᑎᑦᓯᓂᖅ ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑎᓂᒃ ᐊᒻᒪᓗ ᐃᒪᕐᒥᐅᑕᓂᒃ ᖁᒥᐅᑎᓂᒃ ᓯᕗᓕᕐᑕᐅᔪᖅ ᑯᐯᒃᑯᑦ ᑲᕙᒪᖓᓄᑦ, ᐱᓇᓱᖃᑎᖃᕐᑎᓗᒍ ᓄᓇᖁᑎᒥ ᑯᒻᒪᓲᑎᓕᓐᓄᑦ, ᑭᒡᒐᑐᕐᑕᐅᑎᓪᓗᒋᑦ ᐱᓗᐊᕐᑐᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ, ᒪᑭᕝᕕᒧᑦ, ᓇᔅᑳᐱ ᓄᓇᕐᔪᐊᖓᓄᑦ ᑳᐅᒐᐅᒐᐅᑦᓯᑲᒪᒃᒥ, ᑯᔩ ᓄᓇᕐᔪᐊᖓᑕ ᑲᕙᒪᖓᓄᑦ (ᑭᒡᒐᑐᕐᑎᓗᒍ ᒍᐊᑉᒫᒍᔅᑐᐃ ᓄᓇᓕᖓᓂᒃ) ᐊᒻᒪᓗ ᐊᓯᖏᓐᓄᑦ ᓄᓇᓕᓐᓂ ᐊᑦᑐᐊᖃᑕᐅᔪᓄᑦ .
ᓄᓇᕐᔪᐊᑉ ᒥᕐᖑᐃᓯᕐᕕᖏᑦ
ᑯᐯᒻᒥ, ᓄᓇᕐᔪᐊᑉ ᒥᕐᖑᐃᓯᕐᕕᖏᓐᓂᒃ ᐱᓇᓱᐊᕈᑕᐅᔪᑦ ᐊᐅᓚᑕᐅᓂᖏᑦ ᑐᕐᖃᑕᕐᕕᑯᑦ ᓇᐹᕐᑐᓕᓐᓄᑦ, ᐆᒪᔪᓄᑦ ᐊᒻᒪᓗ ᒥᕐᖑᐃᓯᕐᕕᓄᑦ (MFFP) ᐊᑖᓃᑦᑐᑦ, ᐱᖕᖑᑎᑕᐅᑐᐊᕋᒥᒃ, ᓄᓇᕐᔪᐊᑉ ᒥᕐᖑᐃᓯᕐᕕᖏᑦ ᑯᐯᒃ ᓯᕿᓂᖓᓂ ᐊᐅᓚᑕᐅᓲᑦ ᑎᒥᒧᑦ ᑲᒪᔪᒧᑦ ᒪᑭᑕᐅᓯᒪᔪᓂᒃ ᓯᓚᒥ ᐊᓂᔮᕐᕕᓂᒃ ᑯᐯᒻᒥ (SÉPAQ).
ᓄᓇᕕᒻᒥ, ᓴᓇᕐᕈᑎᒃ ᐊᖏᖃᑎᒋᓐᓂᐅᑉ 2002-ᒥ ᑭᖑᓂᐊᒍᑦ, ᐱᓇᓱᓐᓂᖅ ᐱᖕᖑᑎᑦᓯᓚᖓᓗᓂ ᓄᓇᕐᔪᐊᑉ ᒥᕐᖑᐃᓯᕐᕕᓴᖏᓐᓂᒃ ᑲᔪᓯᑎᑕᐅᓲᖑᓕᕐᑐᖅ ᑲᑐᑦᔭᐅᓱᓂ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ (KRG), ᒪᑭᕝᕕᒧᑦ, ᐊᒻᒪᓗ MFFP-ᑯᓄᑦ. ᓄᓇᒥ, Nunavik Parks (KRG ᐃᓗᐊᓂ) ᐊᐅᓚᑦᓯᔨᐅᔪᖅ ᑕᒪᒃᑯᓂᖓ ᒥᕐᖑᐃᓯᕐ[ᕕᓂᒃ.). ᐊᑌᓐᓇᑐᒥᒃ ᐃᓚᐅᖃᑕᐅᓂᖓᑦ ᓄᓇᓕᓐᓂ ᐊᑦᑐᐊᔭᐅᔪᑦ ᐃᓚᐅᖏᓐᓇᒥᔪᖅ ᐃᓘᓐᓈᓂ ᐱᓇᓱᑦᑕᐅᓂᓕᒫᖓᓂ (ᐱᖕᖑᑎᑕᐅᓂᖓ, ᐃᖏᕐᕋᑎᑕᐅᓂᖓ).
ᓄᓇᕐᔪᐊᑉ ᒥᕐᖑᐃᓯᕐᕕᖏᓐᓂ, “ᓄᓀᑦ ᐆᑦᑑᑎᑦᓯᐊᑦ ᐱᐅᓯᕐᓱᑐᓄᑦ ᑯᐯᒃ ᓄᓇᖁᑎᖏᓐᓄᑦ ᐊᒻᒪᓗ ᐊᑦᔨᐅᖏᑦᑐᑦ ᐱᐅᓯᕐᓱᑐᑦ ᐃᓂᖏᑦ ᓴᐳᒻᒥᔭᐅᔪᑦ […] ᐊᒻᒪᓗ ᐱᐅᓯᑎᑕᐅᔪᑦ.” ᑲᕙᒣᑦ ᑮᓇᐅᔭᑎᒍᑦ ᑐᕌᒐᖏᑦ ᐃᓚᐅᑎᑕᐅᔪᑦ ᓄᐃᑦᓯᒍᑕᐅᓂᐊᕐᓱᑎᒃ ᓇᑉᐸᑎᕐᓯᒪᔪᓂᒃ (ᑎᑭᑦᑐᑦ ᐅᐸᒐᖏᓐᓂᒃ, ᐊᕐᖁᑎᓂᒃ, ᐊᓯᖏᓐᓂᓗ), ᐱᕙᓪᓕᐊᒍᑎᓂᒃ (ᐊᕐᖁᑎᐊᐱᓐᓂᒃ, ᐊᓪᓚᓯᒪᔪᓂᒃ ᓄᐃᑕᑦᓯᒍᑎᓂᒃ, ᐊᓯᖏᓐᓂᓗ), ᓱᖃᑦᓯᓂᒃᑯᑦ ᐊᑐᕋᑦᓴᓂᒃ (ᐆᑦᑑᑎᒋᓗᒍ ᐅᒥᐊᑦ ᐊᑦᑕᑐᐊᖑᓂᖏᑦ), ᐊᒻᒪᓗ ᐃᓕᑦᓯᒍᑎᓂᒃ (ᑐᑭᓯᓐᓇᑎᑦᓯᓂᖅ, ᑐᔪᕐᒥᐊᖃᕐᓂᖅ ᐃᓕᓐᓂᐊᑎᓂᒃ ᑎᑭᑦᑐᓂᒃ, ᐊᓯᖏᓪᓗ).
ᒫᓐᓇᐅᓂᖓᓂ ᐃᓕᑕᕐᓯᒪᐅᑏᑦ
ᓄᓇ ᓴᓂᕐᕙᑕᐅᒪᔪᑦ ᓱᒃᑯᑕᐅᑎᑕᐅᑦᑌᓕᔪᓂᒃ ᐱᑦᔪᑎᖃᕐᓱᑎᒃ (TRPAP)
TRPAP ᐃᓕᑕᕐᓯᒪᐅᑎᖓ ᐃᓕᖓᔪᖅ ᐋᕐᕿᐸᓪᓕᐊᓂᖓᓂ ᐊᓪᓚᕕᓕᕆᓂᒃᑯᑦ ᐃᓕᑕᕐᓯᒪᐅᑎᖃᕐᓂᒧᑦ ᐊᖏᕐᑕᐅᔪᖃᖕᖏᓂᖓᓂ ᐊᑌᓐᓇᓂᐊᓕᕐᑐᒥᒃ ᓴᐳᒻᒥᔭᐅᓂᐅᑉ ᐃᓕᑕᕆᔭᐅᒍᑎᖓᓂᒃ. ᑌᒣᑦᑐᓂ ᓄᓇᓂ, ᐊᖏᕐᓂᖅ ᐅᔭᕋᓐᓂᐊᕕᑦᓴᓂᒃ ᐃᓐᓄᐃᒍᑎᓂᒃ ᐊᒻᒪᓗ ᓇᐅᑐᐃᓐᓀᑦ ᐊᖏᕈᑏᑦ ᐊᑦᑐᐊᔪᑦ ᐅᔭᕋᓐᓂᐊᕕᑦᓴᓂᒃ ᕿᓂᕐᓂᒧᑦ ᓄᕐᖃᖓᑎᑕᐅᔪᑦ. ᑖᒃᑯᐊ ᓄᓇᖏᑦ ᒪᓕᒐᖃᕐᒥᔪᑦ ᓱᕕᐅᒍᓐᓇᖏᓐᓂᒥᒃ ᓱᓇᓕᒫᓂᒃ ᐃᑯᒪᐅᑎᖃᕐᓂᒧᑦ ᓇᐹᕐᑐᓂᐊᕐᓂᒧᓪᓗ ᐃᓕᖓᔪᓂᒃ ᐱᓇᓱᐊᕈᑎᓂᒃ.
ᑫᒥᑕᐅᓯᒪᔪᑦ ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑏᑦ (PBR) ᐊᒻᒪᓗ ᑫᒥᑕᐅᓯᒪᔪᑦ ᐃᒪᕐᒥᐅᑕᓂᒃ ᖁᒥᐅᑏᑦ (PAR)
PBR ᐅᕝᕙᓗᓘᓐᓃᑦ PAR ᒫᓐᓇᓯᐅᑎᐅᑦᓱᓂ ᐃᓕᑕᕐᓯᒪᒍᑕᐅᔪᖅ ᐊᑐᕈᒫᕐᓂᐊᓱᓂ ᐊᕐᕌᒍᓄᑦ ᐊᒥᓱᓄᑦ. ᑖᓐᓇ ᐃᓕᑕᕐᓯᒪᐅᑎ ᑐᑭᓕᒃ ᓱᕙᓪᓕᐊᔪᖃᕐᓂᖓᓂᒃ ᑎᒍᓯᒐᓱᐊᕐᑐᓂᒃ ᐊᑌᓐᓇᑐᒥᒃ ᐃᓕᑕᕐᓯᒪᐅᑎᒥᒃ ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑎᒥᒃ ᐅᕝᕙᓗᓘᓐᓃᑦ ᐃᒪᕐᒥᐅᑕᓂᒃ ᖁᒥᐅᑎᒥᒃ. ᐅᔭᕋᓐᓂᐊᓂᖅ, ᐅᕐᓱᓴᔭᒥᒃ ᐊᒻᒪᓗ ᐅᕐᓱᐊᓗᒻᒥᒃ ᐱᕙᓪᓕᐊᒍᑏᑦ, ᐃᒪᕐᒧᑦ ᐃᑯᒪᓕᐅᕈᑏᑦ ᐱᓇᓱᑦᑕᐅᓂᖏᑦ, ᐊᒻᒪᓗ ᓇᐹᕐᑐᓂᒃ ᓇᑲᑎᕆᓂᖅ ᐊᑐᕆᐊᓪᓚᕕᖃᕐᑎᑕᐅᖕᖏᑐᑦ ᑖᒃᑯᓇᓂ ᓄᓇᓂ.
ᓄᓇᕐᔪᐊᑉ ᒥᕐᖑᐃᓯᕐᕕᓴᖓᓂᒃ ᖁᒥᐅᑏᑦ
ᑖᓐᓇ ᐃᓕᑕᕐᓯᒪᐅᑎ ᓇᓗᓀᕐᓯᔪᖅ ᓱᕙᓪᓕᐊᔪᖃᕐᓂᖓᓂᒃ ᑎᒍᓯᒐᓱᐊᕐᑐᓂᒃ ᓄᓇᕐᔪᐊᑉ ᒥᕐᖑᐃᓯᕐᕕᖓᑕ ᐃᓕᑕᕆᔭᐅᒍᑎᖓᓂᒃ. ᐅᔭᕋᓐᓂᐊᓂᖅ, ᐅᕐᓱᓴᔭᒥᒃ ᐊᒻᒪᓗ ᐅᕐᓱᐊᓗᒻᒥᒃ ᐱᕙᓪᓕᐊᒍᑏᑦ, ᐃᒪᕐᒧᑦ ᐃᑯᒪᓕᐅᕈᑏᑦ ᐱᓇᓱᑦᑕᐅᓂᖏᑦ, ᐊᒻᒪᓗ ᓇᐹᕐᑐᓂᒃ ᓇᑲᑎᕆᓂᖅ ᐊᑐᕆᐊᓪᓚᕕᖃᕐᑎᑕᐅᖕᖏᑐᑦ ᑖᒃᑯᓇᓂ ᓄᓇᓂ.
ᐊᑎᖏᑦ ᐊᑐᕐᑕᐅᔪᑦ ᒪᓐᓇᓯᐅᑎᒥᒃ ᐃᓕᑕᕐᓯᒪᐅᑎᓄᑦ (ᑫᒥᑕᐅᓯᒪᔪᑦ ᐃᒪᕐᒥᐅᑕᓂᒃ ᖁᒥᐅᒍᑏᑦ, ᑫᒥᑕᐅᓯᒪᔪᑦ ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑏᑦ, ᐊᓯᖏᓪᓗ) ᒫᓐᓇᓯᐅᑎᐅᒋᕗᑦ. ᐊᑎᓪᓚᕆᖏᑦ ᓇᓗᓀᕐᑕᐅᓕᑌᓐᓇᓲᑦ ᐊᑌᓐᓇᑐᖅ ᓴᐳᒻᒥᔭᐅᒍᑎᐅᑉ ᐃᓕᑕᕐᓇᐅᑎᖓ ᐊᖏᕐᑕᐅᒪᑦ ᑕᒡᒍᖓ ᓄᓇᖓᓄᑦ. ᐊᑎᓪᓚᕆᖃᓕᕐᑐᖅ ᓄᓇᖕᖑᐊᒥ ᐃᓄᒃᑎᑑᕐᑐᓂᒃ (ᐱᖑᐊᓗᐃᑦ, ᑐᕐᓱᔪᖅ, ᐅᓕᑦᑕᓂᐅᔭᓕᒃ, ᑰᕈᕐᔪᐊᖅ). ᑎᒥᐅᔪᐃᑦ ᑭᒡᒐᑐᕐᑐᑦ ᓄᓇᕕᒻᒥᒃ ᐊᒻᒪᓗ ᓄᓇᓕᓐᓂᒃ ᓄᓇᕐᔪᐊᓕᓐᓂᓗ ᑯᒻᒪᓲᑎᓕᓐᓂᒃ ᑕᒪᒃᑯᓂᖓ ᓄᓇᓂᒃ ᓄᐃᑦᓯᓚᖓᔪᑦ ᑫᒥᑦᓯᒍᑎᒥᓂᒃ ᐊᑎᑦᓴᓂᒃ ᓄᓇᖕᖑᐊᒥ ᑐᕌᕐᑎᓗᒋᑦ ᓄᓇᐅᑉ ᖄᖓᓂ ᐊᑎᕐᓂᒃ ᑲᒪᔨᒃᑯᓄᑦ ᑯᐯᒻᒥ (Commission de toponymie du Québec).
2021-ᒥ ᐱᒋᐊᕐᓱᒍ, ᓯᓚᒥ ᕿᒻᒪᖁᑎᓂᒃ ᐱᐅᓕᑦᓯᒪᓂᕐᒧᑦ ᐱᖁᔭᖅ (NHCA) ᐋᕐᕿᒋᐊᕐᑕᐅᒪᑦ, ”ᑫᒥᑕᐅᓯᒪᔪᑦ” ᓄᓀᑦ ᐊᒻᒪᓗ ᓄᓀᑦ ᓴᓂᕐᕙᑕᐅᓯᒪᔪᑦ ᐃᓱᒪᑦᓴᓯᐅᕈᑎᑦᓴᐅᓱᑎᒃ ᐊᑌᓐᓇᑐᒥᒃ ᓴᐳᒻᒥᔭᐅᒍᑎᒥᒃ ᐅᓪᓗᒥ ᐃᓕᑕᕆᔭᐅᒍᑎᖃᓕᕐᑐᑦ ᐊᕐᖁᓵᕆᐊᖃᓚᐅᕋᑎᒃ ᒫᓐᓇᓯᐅᑎᐅᑉ ᐃᓕᑕᕆᔭᐅᒍᑎᖓᑎᒍᑦ. ᑕᒪᓐᓇ ᐱᐅᓯᐅᓚᐅᔪᔪᖅ ᐊᒥᓱᐃᓄᑦ ᑫᒥᑕᐅᓯᒪᔪᓄᑦ ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑎᓄᑦ ᐊᒻᒪᓗ ᐃᒪᕐᒥᐅᑕᓂᒃ ᖁᒥᐅᑎᓄᑦ ᓇᓗᓀᕐᑕᐅᖃᑦᑕᓯᒪᔪᓄᑦ 2021 ᓯᕗᓂᐊᒍᑦ. ᐃᓄᓕᒪᑦ ᐃᓚᐅᑎᑕᐅᓂᖓᑕ ᐱᓇᓱᑦᑕᐅᓂᖓ ᐊᒻᒪᓗ ᐊᕙᑎᒥᒃ ᐃᓄᓐᓂᓗ ᓱᕐᕃᒍᑕᐅᔪᑦ ᕿᒥᕐᕈᔭᐅᓂᖓ ᐊᑐᖏᓐᓇᖃᑦᑕᕆᐊᓖᑦ ᐊᖏᕐᑕᐅᔪᖃᖕᖏᓂᖓᓂ ᐊᑌᓐᓇᑐᒥᒃ ᓴᐳᒻᒥᒍᑎᐅᑉ ᐃᓕᑕᕐᓯᐅᑎᖓᓂᒃ.
ᓴᐳᒻᒥᔭᐅᔪᓂᒃ ᓄᓇᓂᒃ ᐊᐅᓚᑦᓯᓂᖅ
ᑯᐯᒃᑯᑦ ᑲᕙᒪᖓ ᐱᖃᑎᒌᓐᓂᑯᑦ ᐱᓇᓱᖃᑎᓕᒃ ᓄᓇᕕᒻᒥᒃ ᐊᒻᒪᓗ ᐊᑦᔨᒌᖕᖏᑐᓂᒃ ᑯᒻᒪᓲᑎᖃᖃᑕᐅᔪᓂᒃ, ᐃᓚᖃᕐᑎᓗᒋᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ, ᒪᑭᕝᕕᒥᒃ, ᓇᔅᑳᐱ ᓄᓇᕐᔪᐊᖓᓂᒃ ᑲᐅᒐᐅᒐᐅᑦᓯᑲᒪᒃᒥ, ᑯᔩ ᓄᓇᕐᔪᐊᖓᑕ ᑲᕙᒪᖓᓂᒃ, ᐊᓯᖏᓐᓂᓗ ᓄᓇᓕᓐᓂ ᑲᒪᖃᑕᐅᔪᓂᒃ, ᐅᓕᕐᓀᑎᕆᑦᓱᑎᒃ ᐊᐅᓚᑦᓯᒍᓯᑦᓴᒥᒃ ᓴᐳᒻᒥᔭᐅᔪᓂᒃ ᓄᓇᓂᒃ. ᐊᑦᔨᒌᖕᖏᑐᓂᒃ ᓇᓪᓕᑳᕈᑎᑦᓴᓕᒃ. ᓴᐳᒻᒥᔭᐅᔪᖅ ᓄᓇ ᐊᐅᓚᑕᐅᒍᓐᓇᑐᖅ ᑯᐊᐸᑦᑐᓄᑦ, ᓄᓇᓕᒻᒥ ᑎᒥᐅᔪᒧᑦ, ᓄᓇᓕᐅᑉ ᐃᓗᐊᓂ ᑲᕙᒪᐅᔪᒧᑦ, ᐃᓕ,ᒌᑦᑎᒍᑎᒧᓪᓗ ᑎᒥᐅᔪᒧᑦ, ᑌᒫᒐᓚᒃ. ᑕᐅᑐᒐᖓ, ᐊᐅᓚᑦᓯᒍᓯᖓ, ᐊᒻᒪᓗ ᓇᐅᓪᓗᑯᐃᑦ ᓴᐳᒻᒥᔭᐅᒍᑎᖏᑦ ᓇᓗᓀᕐᑕᐅᒍᓐᓇᑐᑦ ᐊᐅᓚᑦᓯᓂᕐᒥᒃ ᐸᕐᓇᓯᒪᐅᑎᒥ ᐊᑐᓂ ᓴᐳᒻᒥᔭᐅᔪᒧᑦ ᓄᓇᒧᑦ.
ᐱᔪᓐᓇᑎᑕᐅᔪᑦ ᐊᒻᒪᓗ ᐱᒋᐊᓪᓚᕕᖃᖕᖏᑐᑦ ᐱᓇᓱᐊᕈᑏᑦ ᓴᐳᒻᒥᔭᐅᔪᓂ ᓄᓇᓂ
ᓯᓚᒥ ᕿᒻᒪᖁᑎᓂᒃ ᐱᐅᓕᑦᓯᒪᓂᕐᒧᑦ ᐱᖁᔭᐅᑉ (NHCA) ᐊᑖᒍᑦ, ᐱᓇᓱᓐᓂᐅᓲᑦ ᐃᓚᖏᑦ ᐊᑐᕐᑕᐅᔪᑦ JBNQA-ᒥ ᐃᓚᐅᔫᖕᖏᑐᓄᑦ ᐊᒻᒪᓗ NEQA-ᒥ ᐃᓚᐅᔫᖕᖏᑐᓄᑦ ᐱᕕᖃᕐᑎᑕᐅᔪᑦ, ᐃᓱᖃᕐᑎᑕᐅᑦᓱᑎᓪᓘᓃᑦ, ᐅᕝᕙᓗᓘᓐᓃᑦ ᐱᒋᐊᓪᓚᕕᖃᕐᑎᑕᐅᒐᑎᒃ ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑎᒥ (ᐅᕝᕙᓗᓘᓐᓃᑦ ᑫᒥᑕᐅᓯᒪᔪᒥ ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑎᑦᓴᒥ) ᐅᕝᕙᓗᓘᓐᓃᑦ ᐃᒪᕐᒥᐅᑕᓂᒃ ᖁᒥᐅᒍᑎᒥ (ᐅᕝᕙᓗᓘᓐᓃᑦ ᑫᒥᑕᐅᓯᒪᔪᒥ ᐃᒪᕐᒥᐅᑕᓂᒃ ᖁᒥᐅᒍᑎᑦᓴᒥ). ᐱᓇᓱᓐᓃᑦ ᐊᑐᕐᑕᐅᔪᑦ TRPAP-ᓂ ᐊᖏᕐᑕᐅᔭᕆᐊᓖᑦ MELCC-ᑯᓄᑦ. ᑕᒪᓐᓇ ᑐᖕᖓᕕᖃᕈᓐᓇᑐᖅ ᓱᓪᓕᑎᒥᒃ ᑭᖑᓪᓕᐹᖓᓂ ᐃᓕᑕᕆᔭᐅᒍᑎ ᐃᓱᒪᒋᔭᐅᓯᒪᔪᖅ ᑌᓐᓇᐅᓯᒪᒋᐊᖓ ᐊᑦᔨᒌᖕᖏᑐᓂᒃ ᐆᒪᔪᖃᕐᓂᒥᒃ ᖁᒥᐅᑎ.
ᒪᓕᑦᓱᒍ ᐃᓚᖓ 24 JBNQA-ᒥ ᐊᒻᒪᓗ ᐃᓚᖓ 15 NEQA-ᒥ, ᐃᓚᐅᔪᐃᑦ ᑌᒃᑯᓄᖓ ᐊᖏᖃᑎᒌᒍᑎᓄᑦ ᐊᑐᕈᓐᓇᑐᑦ ᓂᕿᑦᓴᓂᐊᕐᓂᑯᑦ ᐱᔪᓐᓇᓂᖃᕈᑎᒥᓂᒃ ᓇᓂᓕᒫᖅ ᑲᑎᕕᐅᑉ ᓄᓇᓕᒫᖓᓂ, ᖃᓗᓗᒋᑦ ᑭᓪᓕᓕᐅᕐᑕᐅᒪᔪᑦ ᐃᓘᓐᓇᖏᓐᓄᑦ ᐊᑦᔨᒌᖕᖏᑐᓄᑦ ᓴᐳᒻᒥᔭᐅᒍᑎᓕᓐᓄᑦ ᓄᓇᓄᑦ.
ᐱᓇᓱᑦᑕᐅᓲᖑᓂᕐᐹᑦ ᐃᓘᓐᓈᒍᑦ* ᐱᕕᖃᕐᑎᑕᐅᔪᑦ ᐅᕝᕙᓗᓘᓐᓃᑦ ᐱᒋᐊᓪᓚᕕᖃᖕᖏᑐᑦ ᐃᓚᐅᔫᖕᖏᑐᓄᑦ ᐊᑦᔨᒌᖕᖏᑐᓂᒃ ᐆᒪᔪᖃᕐᓂᒥᒃ ᐊᒻᒪᓗ ᐃᒪᕐᒥᐅᑕᓂᒃ ᖁᒥᐅᑎᓂ
ᐱᓇᓱᑦᑕᐅᔪᖅ | ᐱᕕᓕᒃ /ᐱᕕᖃᖕᖏᑐᖅ |
ᐱᖕᖑᐊᑐᑦ ᐆᒪᔪᕐᓂᐊᓂᖓ | ᐱᕕᓕᒃ |
ᐱᖕᖑᐊᑐᑦ ᐃᖃᓗᓐᓂᐊᓂᖓ | ᐱᕕᓕᒃ |
ᒥᑭᒋᐊᕐᓂᐊᓂᖅ | ᐱᕕᖃᖕᖏᑐᖅ |
ᐁᒍᓐᓇᓂᖅ ᐊᒻᒪᓗ ᐊᐅᓚᓂᖅ ATV-ᑯᑦ ᐅᕝᕙᓗᓘᓐᓃᑦ ᓯᑭᑐᒃᑯᑦ | ᐱᕕᓕᒃ, ᑭᓯᐊᓂ ᐊᒻᒪᑎᕆᓂᖅ ᓄᑖᓂᒃ ᐊᕐᖁᑎᑦᓴᓂᒃ ᑕᒪᓐᓇ ᐱᑦᔪᑎᒋᓗᒍ ᐱᕕᖃᖕᖏᑐᖅ. |
ᐁᒍᓐᓇᓂᖅ ᐊᒻᒪᓗ ᐊᐅᓚᓂᖅ ᐅᒥᐊᓄᑦ ᐊᐅᓚᐅᑎᓕᓐᓄᑦ | ᐱᕕᓕᒃ |
ᕿᑲᕆᐊᕐᓯᒪᓂᖅ ᐱᑕᖃᕇᕐᑐᓂ ᐃᓪᓗᐊᐱᓐᓂ (ᐊᑦᑕᑐᕈᑏᑦ, ᒪᙯᕝᕖᑦ ᐅᕝᕙᓗᓘᓐᓃᑦ ᐃᓪᓗᐊᐲᑦ) | ᐱᕕᓕᒃ |
ᐊᖏᕐᓂᖅ ᓄᑖᓂᒃ ᓄᓇᒥ ᐱᔪᓐᓇᓂᖃᕈᑎᓂᒃ ᓇᒻᒥᓂᖅ ᐊᑐᕈᓐᓇᓗᓂ (ᕿᑲᕆᐊᕐᓯᒪᓂᖅ, ᒪᑭᑕᑫᓐᓇᑐᑦ ᐃᑎᕐᕕᓭᑦ, ᐊᓯᖏᓪᓗ) | ᐱᕕᖃᖕᖏᑐᖅ |
ᓄᐊᑦᓯᓂᖅ ᕿᔫᖕᖏᑐᓂᒃ ᓇᐹᕐᑐᓕᓐᓂ ᐱᕈᕐᑐᓂᒃ (ᐸᐅᕐᙰᑦ, ᐊᓄᕆᓯᐅᑏᑦ, ᐊᓯᖏᓪᓗ) | ᐱᕕᓕᒃ |
ᐃᑯᐊᓚᔪᑦᓴᓂᒃ ᕿᔪᑦᑕᓂᖅ | ᐱᕕᖃᖕᖏᑐᖅ |
ᓇᐹᕐᑐᓂᐊᕐᓂᖅ | ᐱᕕᖃᖕᖏᑐᖅ |
ᖃᐅᔨᓴᐅᑏᑦ ᐊᒻᒪᓗ ᐃᓕᓐᓂᐊᓂᖅ | ᐱᕕᓕᒃ |
ᐅᔭᕋᓐᓂᐊᑦ, ᐅᕐᓱᐊᓗᓐᓂᐊᑦ ᐊᒻᒪᓗ ᐅᕐᓱᕈᑎᑦᓴᓂᐊᑦ ᐱᓇᓱᓐᓂᖏᑦ | ᐱᕕᖃᖕᖏᑐᖅ |
ᓴᓇᓂᖅ ᐃᒪᕐᒥ ᐃᑯᒪᓕᐅᕈᑎᓂᒃ ᐊᒻᒪᓗ ᓂᐅᕐᕈᑎᑦᓴᒥᒃ ᐃᑯᒪᓕᐅᕐᓂᒥᒃ ᐱᓇᓱᐊᕈᑎᓂᒃ (ᐃᓚᐅᑎᓪᓗᒍ ᐃᑯᒪᐅᑉ ᐊᑦᓱᓈᖓᑕ ᓴᓇᔭᐅᓂᖓ) | ᐱᕕᖃᖕᖏᑐᖅ |
ᐱᓇᓱᐊᕐᓂᖏᑦ ZEC-ᖑᔪᑦ, ᒪᙯᑦᑎᓯᔩᑦ, ᐊᒻᒪᓗ ᐆᒪᔪᐃᑦ ᐱᐅᓕᒪᕕᖏᑦ | ᐱᕕᓕᒃ |
ᐱᕈᕐᑐᓴᓕᐅᕐᓂᖅ | ᐱᕕᓕᒃ ᐊᖏᕐᑕᐅᒍᑎᒋᓗᒍ |
ᐱᕈᕐᑐᓂᒃ ᓂᕿᑦᓴᓂᐊᕐᓂᖅ | ᐱᕕᖃᖕᖏᑐᖅ |
ᓴᓇᓂᖅ ᓄᑖᓂᒃ ᓇᑉᐸᑎᒐᕐᓂᒃ (ᐃᓪᓗᔪᐊᑦ, ᐊᕐᖁᑎᒻᒪᕇᑦ, ᐊᕐᖁᑎᐊᐲᑦ, ᐊᓯᖏᓐᓗ) | ᐱᕕᓕᒃ ᐊᖏᕐᑕᐅᒍᑎᒋᓗᒍ |
* ᖃᓅᒐᓗᐊᕐᐸᑦ ᐅᐊᕈᑕᐅᔪᑦ ᑖᒃᑯᓇᓂ ᓈᓴᕐᑕᐅᔪᓂ ᑕᐅᕐᓯᐅᑎᒋᐊᖃᖕᖏᑐᑦ ᐱᖁᔭᕐᑎᒍᑦ ᐃᓕᑕᕆᔭᐅᔪᓄᑦ ᐊᓪᓚᓄᑦ (NHCA-ᓂ ᐊᒻᒪᓗ ᐱᐅᓕᒪᑦᓯᓂᕐᒥᒃ ᐸᕐᓇᓯᒪᐅᑎᓂ ᐊᑐᓂ ᖁᒥᐅᑎᒧᑦ).