ᓴᐳᒻᒥᔭᐅᔪᑦ ᓄᓀᑦ ᐃᓕᑕᕆᔭᐅᓂᖏᑦ

ᓄᓇᕕᒻᒥ, ᓴᐳᒻᒥᔭᐅᔪᑦ ᓄᓀᑦ ᑕᖏᖃᕐᑎᑕᐅᕗᑦ ᓄᓇᕐᔪᐊᑉ ᒥᕐᖑᐃᓯᕐᕕᖏᓐᓄᑦ, ᓄᓇᕐᔪᐊᑉ ᒥᕐᖑᐃᓯᕐᕕᓴᖏᓐᓄᑦ ᖁᒥᐅᑎᓄᑦ, ᑫᒥᑕᐅᓯᒪᔪᓄᑦ ᐊᑦᔨᒋᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑎᓄᑦ, ᐊᑕᐅᓯᕐᒧᑦ ᑫᒥᑕᐅᓯᒪᔪᒧᑦ ᐃᒪᕐᒥᐅᑕᓂᒃ ᖁᒥᐅᑎᒧᑦ, ᐊᒻᒪᓗ ᓄᓇᖁᑎᒥ ᖁᒥᐅᑎᓄᑦ ᐱᑦᔪᑎᓕᓐᓄᑦ ᓴᐳᒻᒥᔭᐅᔪᒥᒃ ᓄᓇᖃᕐᓂᒥᒃ. ᑖᒃᑯᐊ ᒪᓕᑦᑐᑦ ᑳᑎᑰᔨ II-ᒥ ᓴᐳᒻᒥᔭᐅᔪᑦ ᓄᓇᖏᓐᓂᒃ ᑐᓴᕐᓱᓂ International Union for Conservation of Nature (IUCN), ᓴᐳᒻᒥᔭᐅᒍᑏᑦ ᐳᕐᑐᓂᕐᐹᑦ ᐃᓚᖓᓐᓄᑦ. ᓴᐳᒻᒥᔭᐅᔪᑦ ᓄᓀᑦ ᐊᓱᐃᓛᒃ ᓱᕐᖁᐃᕈᑕᐅᕗᑦ ᓴᐳᒻᒥᓯᓂᕐᒥᒃ ᓄᓇᓂᒃ ᐆᑦᑑᑎᑦᓯᐊᓂᒃ ᐆᒪᕕᓐᓄᑦ ᐊᒻᒪᓗ ᐃᓗᕐᖁᓯᕆᔭᐅᔪᓄᑦ ᑕᒪᑐᒧᖓ ᓄᓇᒧᑦ ᐊᑦᑐᐊᔪᓄᑦ.

ᒪᓂᔭᐅᒪᔪᑦ ᖃᓄᐃᑦᑐᑐᐃᓐᓀᑦ ᐆᒪᔪᐃᑦ ᐃᓂᖏᑦ ᓴᓂᕐᕙᑕᐅᒪᔪᑦ ᐊᒻᒪᓗ ᒪᓂᔭᐅᒪᔪᑦ ᐃᒪᕐᒥᐅᑌᑦ ᓴᓂᕐᕙᑕᐅᒪᔪᑦ

ᑯᐯᒻᒥ, ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑏᑦ ᐃᒪᕐᒥᐅᑕᓂᓪᓗ ᖁᒥᐅᑏᑦ ᐃᓘᓐᓈᒍᑦ ᐊᐅᓚᑕᐅᓲᖑᕗᑦ ᑐᕐᖃᑕᕐᕕᑯᓐᓄᑦ ᐊᕙᑎᓕᕆᓂᕐᒧᑦ ᐊᒻᒪᓗ ᐊᑭᒪᑦᔭᓂᕐᒧᑦ ᓯᓚᐅᑉ ᐊᓯᑦᔨᐸᓪᓕᐊᓂᖓᓂᒃ (MELCCFP). ᐱᑦᔪᑎᖓ ᐊᒻᒪᓗ ᓴᐳᒻᒥᔭᐅᒍᑎᖏᑦ ᓇᓗᓀᕐᑕᐅᔪᑦ ᐱᐅᓕᒪᑦᓯᒍᑎᓂᒃ ᐸᕐᓇᓯᒪᐅᑎᖓᓂ. ᐃᓕᓐᓂᐊᓂᕐᒥᒃ ᐅᕝᕙᓗᓘᓐᓃᑦ ᓱᖃᑦᓯᒍᑎᒥᒃ ᐱᓇᓱᐊᕈᑕᐅᔪᑦ ᑲᔪᓯᑎᑕᐅᒍᓐᓇᑐᑦ, ᑭᓯᐊᓂ ᑕᒪᒃᑯᐊ ᐱᓇᓱᐊᑦᓭᑦ ᐊᑦᑐᐊᔨᖏᓪᓗ ᑮᓇᐅᔭᑎᒍᑦ ᑐᕌᒉᑦ ᐱᒍᓪᓕᐅᔪᑦ ᐱᒋᐊᕐᑎᑕᖏᓐᓂᒃ ᓄᓇᓖᑦ ᐅᕝᕙᓗᓘᓐᓃᑦ ᐊᑦᑐᐊᔭᐅᔪᑦ.

ᓄᓇᕕᒻᒥ, ᐱᖕᖑᑎᑦᓯᓂᖅ ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑎᓂᒃ ᐊᒻᒪᓗ ᐃᒪᕐᒥᐅᑕᓂᒃ ᖁᒥᐅᑎᓂᒃ ᓯᕗᓕᕐᑕᐅᔪᖅ ᑯᐯᒃᑯᑦ ᑲᕙᒪᖓᓄᑦ, ᐱᓇᓱᖃᑎᖃᕐᑎᓗᒍ ᓄᓇᖁᑎᒥ ᑯᒻᒪᓲᑎᓕᓐᓄᑦ, ᑭᒡᒐᑐᕐᑕᐅᑎᓪᓗᒋᑦ ᐱᓗᐊᕐᑐᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ, ᒪᑭᕝᕕᒧᑦ, ᓇᔅᑳᐱ ᓄᓇᕐᔪᐊᖓᓄᑦ ᑳᐅᒐᐅᒐᐅᑦᓯᑲᒪᒃᒥ, ᑯᔩ ᓄᓇᕐᔪᐊᖓᑕ ᑲᕙᒪᖓᓄᑦ (ᑭᒡᒐᑐᕐᑎᓗᒍ ᒍᐊᑉᒫᒍᔅᑐᐃ ᓄᓇᓕᖓᓂᒃ) ᐊᒻᒪᓗ ᐊᓯᖏᓐᓄᑦ ᓄᓇᓕᓐᓂ ᐊᑦᑐᐊᖃᑕᐅᔪᓄᑦ .

ᑲᖏᕐᓱᐊᓗᑦᔪᐊᑉ ᑰᖓ - ᓄᓇ ᑐᓄᕙᕐᑕᐅᒪᔪᖅ ᓱᒃᑯᑕᐅᑎᑕᐅᑦᑌᓕᔪᑦᓴᔭᐅᑦᓱᓂ ©, Fredric Poisson , ᑯᐯᒃᑯᑦ ᐊᕙᑎᓕᕆᔨᒃᑯᖏᑦᑕ ᓯᓚᐅᓪᓗ ᐊᓯᑦᔨᐸᓪᓕᐊᓂᖓᓄᑦ ᑐᕐᖃᑕᕐᕕᖓ

ᓄᓇᕐᔪᐊᑉ ᒥᕐᖑᐃᓯᕐᕕᖏᑦ

ᑯᐯᒻᒥ, ᓄᓇᕐᔪᐊᑉ ᒥᕐᖑᐃᓯᕐᕕᖏᓐᓂᒃ ᐱᓇᓱᐊᕈᑕᐅᔪᑦ ᐊᐅᓚᑕᐅᓂᖏᑦ ᑐᕐᖃᑕᕐᕕᑯᑦ ᓇᐹᕐᑐᓕᓐᓄᑦ, ᐆᒪᔪᓄᑦ ᐊᒻᒪᓗ ᒥᕐᖑᐃᓯᕐᕕᓄᑦ (MFFP) ᐊᑖᓃᑦᑐᑦ, ᐱᖕᖑᑎᑕᐅᑐᐊᕋᒥᒃ, ᓄᓇᕐᔪᐊᑉ ᒥᕐᖑᐃᓯᕐᕕᖏᑦ ᑯᐯᒃ ᓯᕿᓂᖓᓂ ᐊᐅᓚᑕᐅᓲᑦ ᑎᒥᒧᑦ ᑲᒪᔪᒧᑦ ᒪᑭᑕᐅᓯᒪᔪᓂᒃ ᓯᓚᒥ ᐊᓂᔮᕐᕕᓂᒃ ᑯᐯᒻᒥ (SÉPAQ).

ᓄᓇᕕᒻᒥ, ᓴᓇᕐᕈᑎᒃ ᐊᖏᖃᑎᒋᓐᓂᐅᑉ 2002-ᒥ ᑭᖑᓂᐊᒍᑦ, ᐱᓇᓱᓐᓂᖅ ᐱᖕᖑᑎᑦᓯᓚᖓᓗᓂ ᓄᓇᕐᔪᐊᑉ ᒥᕐᖑᐃᓯᕐᕕᓴᖏᓐᓂᒃ ᑲᔪᓯᑎᑕᐅᓲᖑᓕᕐᑐᖅ ᑲᑐᑦᔭᐅᓱᓂ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ (KRG), ᒪᑭᕝᕕᒧᑦ, ᐊᒻᒪᓗ MFFP-ᑯᓄᑦ. ᓄᓇᒥ, Nunavik Parks (KRG ᐃᓗᐊᓂ) ᐊᐅᓚᑦᓯᔨᐅᔪᖅ ᑕᒪᒃᑯᓂᖓ ᒥᕐᖑᐃᓯᕐ[ᕕᓂᒃ.). ᐊᑌᓐᓇᑐᒥᒃ ᐃᓚᐅᖃᑕᐅᓂᖓᑦ ᓄᓇᓕᓐᓂ ᐊᑦᑐᐊᔭᐅᔪᑦ ᐃᓚᐅᖏᓐᓇᒥᔪᖅ ᐃᓘᓐᓈᓂ ᐱᓇᓱᑦᑕᐅᓂᓕᒫᖓᓂ (ᐱᖕᖑᑎᑕᐅᓂᖓ, ᐃᖏᕐᕋᑎᑕᐅᓂᖓ).

ᓄᓇᕐᔪᐊᑉ ᒥᕐᖑᐃᓯᕐᕕᖏᓐᓂ, “ᓄᓀᑦ ᐆᑦᑑᑎᑦᓯᐊᑦ ᐱᐅᓯᕐᓱᑐᓄᑦ ᑯᐯᒃ ᓄᓇᖁᑎᖏᓐᓄᑦ ᐊᒻᒪᓗ ᐊᑦᔨᐅᖏᑦᑐᑦ ᐱᐅᓯᕐᓱᑐᑦ ᐃᓂᖏᑦ ᓴᐳᒻᒥᔭᐅᔪᑦ […] ᐊᒻᒪᓗ ᐱᐅᓯᑎᑕᐅᔪᑦ.” ᑲᕙᒣᑦ ᑮᓇᐅᔭᑎᒍᑦ ᑐᕌᒐᖏᑦ ᐃᓚᐅᑎᑕᐅᔪᑦ ᓄᐃᑦᓯᒍᑕᐅᓂᐊᕐᓱᑎᒃ ᓇᑉᐸᑎᕐᓯᒪᔪᓂᒃ (ᑎᑭᑦᑐᑦ ᐅᐸᒐᖏᓐᓂᒃ, ᐊᕐᖁᑎᓂᒃ, ᐊᓯᖏᓐᓂᓗ), ᐱᕙᓪᓕᐊᒍᑎᓂᒃ (ᐊᕐᖁᑎᐊᐱᓐᓂᒃ, ᐊᓪᓚᓯᒪᔪᓂᒃ ᓄᐃᑕᑦᓯᒍᑎᓂᒃ, ᐊᓯᖏᓐᓂᓗ), ᓱᖃᑦᓯᓂᒃᑯᑦ ᐊᑐᕋᑦᓴᓂᒃ (ᐆᑦᑑᑎᒋᓗᒍ ᐅᒥᐊᑦ ᐊᑦᑕᑐᐊᖑᓂᖏᑦ), ᐊᒻᒪᓗ ᐃᓕᑦᓯᒍᑎᓂᒃ (ᑐᑭᓯᓐᓇᑎᑦᓯᓂᖅ, ᑐᔪᕐᒥᐊᖃᕐᓂᖅ ᐃᓕᓐᓂᐊᑎᓂᒃ ᑎᑭᑦᑐᓂᒃ, ᐊᓯᖏᓪᓗ).

Marais-Maritime ᑎᒻᒥᐊᓄᑦ ᐊᒥᓱᓄᓪᓗ ᐊᑦᔨᒌᖕᖏᑐᓄᑦ ᐃᖃᓗᓐᓄᑦ ᓇᔪᒐᖅ ᓄᓇ ᑐᓄᕙᕐᑕᐅᒪᔪᖅ ᓱᒃᑯᑕᐅᑎᑕᐅᑦᑌᓕᔪᑦᓴᔭᐅᑦᓱᓂ ©, Benoit Tremblay, ᑯᐯᒃᑯᑦ ᐊᕙᑎᓕᕆᔨᒃᑯᖏᑦᑕ ᓯᓚᐅᓪᓗ ᐊᓯᑦᔨᐸᓪᓕᐊᓂᖓᓄᑦ ᑐᕐᖃᑕᕐᕕᖓ

ᓄᓇ ᓴᓂᕐᕙᑕᐅᒪᔪᑦ ᓱᒃᑯᑕᐅᑎᑕᐅᑦᑌᓕᔪᓂᒃ ᐱᑦᔪᑎᖃᕐᓱᑎᒃ (TRPAP)

TRPAP ᐃᓕᑕᕐᓯᒪᐅᑎᖓ ᐃᓕᖓᔪᖅ ᐋᕐᕿᐸᓪᓕᐊᓂᖓᓂ ᐊᓪᓚᕕᓕᕆᓂᒃᑯᑦ ᐃᓕᑕᕐᓯᒪᐅᑎᖃᕐᓂᒧᑦ ᐊᖏᕐᑕᐅᔪᖃᖕᖏᓂᖓᓂ ᐊᑌᓐᓇᓂᐊᓕᕐᑐᒥᒃ ᓴᐳᒻᒥᔭᐅᓂᐅᑉ ᐃᓕᑕᕆᔭᐅᒍᑎᖓᓂᒃ. ᑌᒣᑦᑐᓂ ᓄᓇᓂ, ᐊᖏᕐᓂᖅ ᐅᔭᕋᓐᓂᐊᕕᑦᓴᓂᒃ ᐃᓐᓄᐃᒍᑎᓂᒃ ᐊᒻᒪᓗ ᓇᐅᑐᐃᓐᓀᑦ ᐊᖏᕈᑏᑦ ᐊᑦᑐᐊᔪᑦ ᐅᔭᕋᓐᓂᐊᕕᑦᓴᓂᒃ ᕿᓂᕐᓂᒧᑦ ᓄᕐᖃᖓᑎᑕᐅᔪᑦ. ᑖᒃᑯᐊ ᓄᓇᖏᑦ ᒪᓕᒐᖃᕐᒥᔪᑦ ᓱᕕᐅᒍᓐᓇᖏᓐᓂᒥᒃ ᓱᓇᓕᒫᓂᒃ ᐃᑯᒪᐅᑎᖃᕐᓂᒧᑦ ᓇᐹᕐᑐᓂᐊᕐᓂᒧᓪᓗ ᐃᓕᖓᔪᓂᒃ ᐱᓇᓱᐊᕈᑎᓂᒃ.

ᑫᒥᑕᐅᓯᒪᔪᑦ ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑏᑦ (PBR) ᐊᒻᒪᓗ ᑫᒥᑕᐅᓯᒪᔪᑦ ᐃᒪᕐᒥᐅᑕᓂᒃ ᖁᒥᐅᑏᑦ (PAR)

PBR ᐅᕝᕙᓗᓘᓐᓃᑦ PAR ᒫᓐᓇᓯᐅᑎᐅᑦᓱᓂ ᐃᓕᑕᕐᓯᒪᒍᑕᐅᔪᖅ ᐊᑐᕈᒫᕐᓂᐊᓱᓂ ᐊᕐᕌᒍᓄᑦ ᐊᒥᓱᓄᑦ. ᑖᓐᓇ ᐃᓕᑕᕐᓯᒪᐅᑎ ᑐᑭᓕᒃ ᓱᕙᓪᓕᐊᔪᖃᕐᓂᖓᓂᒃ ᑎᒍᓯᒐᓱᐊᕐᑐᓂᒃ ᐊᑌᓐᓇᑐᒥᒃ ᐃᓕᑕᕐᓯᒪᐅᑎᒥᒃ ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑎᒥᒃ ᐅᕝᕙᓗᓘᓐᓃᑦ ᐃᒪᕐᒥᐅᑕᓂᒃ ᖁᒥᐅᑎᒥᒃ. ᐅᔭᕋᓐᓂᐊᓂᖅ, ᐅᕐᓱᓴᔭᒥᒃ ᐊᒻᒪᓗ ᐅᕐᓱᐊᓗᒻᒥᒃ ᐱᕙᓪᓕᐊᒍᑏᑦ, ᐃᒪᕐᒧᑦ ᐃᑯᒪᓕᐅᕈᑏᑦ ᐱᓇᓱᑦᑕᐅᓂᖏᑦ, ᐊᒻᒪᓗ ᓇᐹᕐᑐᓂᒃ ᓇᑲᑎᕆᓂᖅ ᐊᑐᕆᐊᓪᓚᕕᖃᕐᑎᑕᐅᖕᖏᑐᑦ ᑖᒃᑯᓇᓂ ᓄᓇᓂ.

ᑯᕕᐅᑉ ᑰᖓ - ᐊᑦᔨᒌᖕᖏᑐᓄᑦ ᐃᒪᕐᒥᐅᑕᓄᑦ ᐱᕈᕐᑐᓄᓪᓗ ᐃᓂᒋᔭᐅᔪᖅ ᑐᓄᕙᕐᑕᐅᖁᔭᐅᓯᒪᔪᖅ © Catherine Pinard, ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᐃᓗᐃᓕᒃ ᒥᕐᖑᐃᓯᕐᕕᒃ © Marianne Ricard, ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᓄᓇᕐᔪᐊᑉ ᒥᕐᖑᐃᓯᕐᕕᓴᖓᓂᒃ ᖁᒥᐅᑏᑦ

ᑖᓐᓇ ᐃᓕᑕᕐᓯᒪᐅᑎ ᓇᓗᓀᕐᓯᔪᖅ ᓱᕙᓪᓕᐊᔪᖃᕐᓂᖓᓂᒃ ᑎᒍᓯᒐᓱᐊᕐᑐᓂᒃ ᓄᓇᕐᔪᐊᑉ ᒥᕐᖑᐃᓯᕐᕕᖓᑕ ᐃᓕᑕᕆᔭᐅᒍᑎᖓᓂᒃ. ᐅᔭᕋᓐᓂᐊᓂᖅ, ᐅᕐᓱᓴᔭᒥᒃ ᐊᒻᒪᓗ ᐅᕐᓱᐊᓗᒻᒥᒃ ᐱᕙᓪᓕᐊᒍᑏᑦ, ᐃᒪᕐᒧᑦ ᐃᑯᒪᓕᐅᕈᑏᑦ ᐱᓇᓱᑦᑕᐅᓂᖏᑦ, ᐊᒻᒪᓗ ᓇᐹᕐᑐᓂᒃ ᓇᑲᑎᕆᓂᖅ ᐊᑐᕆᐊᓪᓚᕕᖃᕐᑎᑕᐅᖕᖏᑐᑦ ᑖᒃᑯᓇᓂ ᓄᓇᓂ.

ᐊᑎᖏᑦ ᐊᑐᕐᑕᐅᔪᑦ ᒪᓐᓇᓯᐅᑎᒥᒃ ᐃᓕᑕᕐᓯᒪᐅᑎᓄᑦ (ᑫᒥᑕᐅᓯᒪᔪᑦ ᐃᒪᕐᒥᐅᑕᓂᒃ ᖁᒥᐅᒍᑏᑦ, ᑫᒥᑕᐅᓯᒪᔪᑦ ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑏᑦ, ᐊᓯᖏᓪᓗ) ᒫᓐᓇᓯᐅᑎᐅᒋᕗᑦ.

ᐊᑎᓪᓚᕆᖏᑦ ᓇᓗᓀᕐᑕᐅᓕᑌᓐᓇᓲᑦ ᐊᑌᓐᓇᑐᖅ ᓴᐳᒻᒥᔭᐅᒍᑎᐅᑉ ᐃᓕᑕᕐᓇᐅᑎᖓ ᐊᖏᕐᑕᐅᒪᑦ ᑕᒡᒍᖓ ᓄᓇᖓᓄᑦ. ᐊᑎᓪᓚᕆᖃᓕᕐᑐᖅ ᓄᓇᖕᖑᐊᒥ ᐃᓄᒃᑎᑑᕐᑐᓂᒃ (ᐱᖑᐊᓗᐃᑦ, ᑐᕐᓱᔪᖅ, ᐅᓕᑦᑕᓂᐅᔭᓕᒃ, ᑰᕈᕐᔪᐊᖅ). ᑎᒥᐅᔪᐃᑦ ᑭᒡᒐᑐᕐᑐᑦ ᓄᓇᕕᒻᒥᒃ ᐊᒻᒪᓗ ᓄᓇᓕᓐᓂᒃ ᓄᓇᕐᔪᐊᓕᓐᓂᓗ ᑯᒻᒪᓲᑎᓕᓐᓂᒃ ᑕᒪᒃᑯᓂᖓ ᓄᓇᓂᒃ ᓄᐃᑦᓯᓚᖓᔪᑦ ᑫᒥᑦᓯᒍᑎᒥᓂᒃ ᐊᑎᑦᓴᓂᒃ ᓄᓇᖕᖑᐊᒥ ᑐᕌᕐᑎᓗᒋᑦ ᓄᓇᐅᑉ ᖄᖓᓂ ᐊᑎᕐᓂᒃ ᑲᒪᔨᒃᑯᓄᑦ ᑯᐯᒻᒥ (Commission de toponymie du Québec).

2021-ᒥ ᐱᒋᐊᕐᓱᒍ, ᓯᓚᒥ ᕿᒻᒪᖁᑎᓂᒃ ᐱᐅᓕᑦᓯᒪᓂᕐᒧᑦ ᐱᖁᔭᖅ (NHCA) ᐋᕐᕿᒋᐊᕐᑕᐅᒪᑦ, ”ᑫᒥᑕᐅᓯᒪᔪᑦ” ᓄᓀᑦ ᐊᒻᒪᓗ ᓄᓀᑦ ᓴᓂᕐᕙᑕᐅᓯᒪᔪᑦ ᐃᓱᒪᑦᓴᓯᐅᕈᑎᑦᓴᐅᓱᑎᒃ ᐊᑌᓐᓇᑐᒥᒃ ᓴᐳᒻᒥᔭᐅᒍᑎᒥᒃ ᐅᓪᓗᒥ ᐃᓕᑕᕆᔭᐅᒍᑎᖃᓕᕐᑐᑦ ᐊᕐᖁᓵᕆᐊᖃᓚᐅᕋᑎᒃ ᒫᓐᓇᓯᐅᑎᐅᑉ ᐃᓕᑕᕆᔭᐅᒍᑎᖓᑎᒍᑦ. ᑕᒪᓐᓇ ᐱᐅᓯᐅᓚᐅᔪᔪᖅ ᐊᒥᓱᐃᓄᑦ ᑫᒥᑕᐅᓯᒪᔪᓄᑦ ᐊᑦᔨᒌᖕᖏᑐᓂᒃ ᐆᒪᔪᖃᕐᕕᒥᒃ ᖁᒥᐅᑎᓄᑦ ᐊᒻᒪᓗ ᐃᒪᕐᒥᐅᑕᓂᒃ ᖁᒥᐅᑎᓄᑦ ᓇᓗᓀᕐᑕᐅᖃᑦᑕᓯᒪᔪᓄᑦ 2021 ᓯᕗᓂᐊᒍᑦ. ᐃᓄᓕᒪᑦ ᐃᓚᐅᑎᑕᐅᓂᖓᑕ ᐱᓇᓱᑦᑕᐅᓂᖓ ᐊᒻᒪᓗ ᐊᕙᑎᒥᒃ ᐃᓄᓐᓂᓗ ᓱᕐᕃᒍᑕᐅᔪᑦ ᕿᒥᕐᕈᔭᐅᓂᖓ ᐊᑐᖏᓐᓇᖃᑦᑕᕆᐊᓖᑦ ᐊᖏᕐᑕᐅᔪᖃᖕᖏᓂᖓᓂ ᐊᑌᓐᓇᑐᒥᒃ ᓴᐳᒻᒥᒍᑎᐅᑉ ᐃᓕᑕᕐᓯᐅᑎᖓᓂᒃ.

ᓱᓇᐅᕚ ᓱᒃᑯᑕᐅᑎᑕᐅᑦᑌᓕᔪᖅ ᓄᓇ ᓄᓇᕕᒻᒥ?

ᑯᐯᒃᑯᑦ ᑲᕙᒪᒃᑯᖏᓐᓄᑦ, ᐱᐅᓯᕐᓱᑐᕐᒥᒃ ᓄᓇᒥᒃ ᐸᐸᑦᓯᓂᖅ ᓱᒃᑯᑕᐅᑎᑦᓯᑌᓕᓂᑎᒍᑦ ᐃᒣᓕᕗᖅ, “…ᓴᐳᑦᔨᓂᖅ ᑭᒡᒐᑐᕐᑐᓂᒃ ᐆᑦᑑᑎᖏᓐᓂᒃ ᐃᓘᓐᓇᖏᓐᓄᑦ ᖃᓄᐃᑦᑐᑐᐃᓐᓀᑦ ᐆᒪᔪᐃᑦ ᐃᓂᖏᓐᓄᑦ.” ᑌᒣᒻᒪᑦ ᐊᐱᕆᐅᑎ “ᐃᑉᐱᒋᔭᖃᕐᓂᒧᑦ ᓱᒃᑯᑕᐅᑎᑕᐅᑦᑌᓕᔪᓂᒃ ᑭᒡᒐᑐᕐᑐᓂᒃ ᓄᓇᓂᒃ ᐊᑦᔨᐅᖏᑦᑐᓄᑦ ᐆᒪᔪᐃᑦ ᐃᓂᖏᓐᓄᑦ, ᐃᓘᓐᓇᖏᓐᓂ ᐱᓇᓱᐊᕐᑕᐅᔪᓂ, ᐱᑕᖃᓚᖓᔪᒥᒃ ᐆᒪᔪᓕᒫᓂᒃ ᐊᑦᔨᒌᖕᖏᑐᓂᒃ ᑯᐯᒻᒥ.”

“[…} ᑌᒣᒻᒪᑦ, ᖃᓄᐃᑦᑐᑐᐃᓐᓀᑦ ᐆᒪᔪᐃᑦ ᐃᓂᖏᓐᓄᑦ ᓴᓂᕐᕙᑕᐅᒪᔪᑦ ᐅᕝᕙᓘᓐᓃᑦ ᐃᒪᕐᒥᐅᑕᓄᑦ ᓴᓂᕐᕙᑕᐅᒪᔪᑦ ᓴᐳᒻᒥᑐᐃᓐᓇᕆᐊᓖᑦ, ᑭᒡᒐᑐᕐᑐᒥᒃ ᐆᒪᔪᐃᑦ ᐃᓂᖏᓐᓂᒃ ᐃᓚᖓᓂ ᐱᐅᔪᐊᓗᔮᖕᖏᑐᓂᒃ ᐆᒪᔪᐃᑦ ᐊᑦᔨᒌᖕᖏᓂᖏᑦ ᑕᑯᓐᓇᓗᒋᑦ ᐅᕝᕙᓘᓐᓃᑦ ᐊᔪᒉᑦᑑᖕᖏᑐᖅ ᓄᓇᖓ. ᑭᓯᐊᓂ, ᐃᓘᓐᓇᑎᒃ ᐆᒪᔪᐃᑦ ᐃᓂᖏᑦ ᐊᒻᒪᓗ ᐃᓗᓕᖏᑦ ᐱᐅᓯᕐᓱᑐᑦ ᐊᕙᑎᒥ, ᑯᐯᒻᒥ ᐱᒋᔭᐅᓲᑐᖃᐅᒐᓗᐊᕈᓂ, ᓱᒃᑯᑕᐅᑎᑕᐅᑦᑌᓕᒋᐊᓕᒃ ᑯᐯᒻᒥ ᐱᓇᓱᐊᕐᑕᐅᔪᓄᑦ ᐃᓚᒋᔭᐅᒋᐊᓕᒃ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ.”

ᓄᓇᕕᒻᒥ, ᐃᓗᕐᖁᓯᖓᓅᓕᖓᔪᖅ ᐃᓚᐅᒋᐊᖃᕐᒥᔪᖅ ᐱᕙᓪᓕᐊᔭᐅᓂᖓᓄᑦ ᓄᐃᑦᓯᓂᖏᓐᓄᑦ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ. ᐃᓚᐅᑎᑕᐅᖃᑕᐅᔪᖅ ᑲᒪᒋᔭᐊᔪᓄᑦ ᐊᒻᒪᓗ ᐱᕙᓪᓕᐊᑎᑕᐅᔪᓃᖃᑕᐅᑦᓱᓂ. ᖃᐅᔨᒋᐊᕐᓂᖅ ᓄᓇᓕᓕᒫᓂ ᐱᓇᓱᐊᖃᑕᐅᔪᑦ ᐱᒻᒪᕆᐅᒻᒥᔪᑦ ᐱᕙᓪᓕᐊᔭᐅᓂᖓᓄᑦ. ᐱᒍᓐᓇᐅᑎᖏᑦ ᐃᓚᐅᔪᑦ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ (JBNQA) ᐊᒻᒪᓗ ᑯᐯᒃ ᑕᕐᕋᖓᑕ ᓯᕿᓂᖓᓂ ᐊᖏᖃᑎᒌᓐᓂᖓ (ᓇᔅᑳᐱᒃᑯᑦ ᐊᖏᖃᑎᒌᓐᓂᖓ) (NEQA) ᐃᑉᐱᒋᔭᐅᔪᑦ ᐊᒻᒪᓗ ᓴᐳᑎᔭᐅᒪᑦᓱᑎᒃ ᓱᒃᑯᑕᐅᑎᑕᐅᑦᑌᓕᔪᓂ ᓄᓇᓂ ᓄᓇᕕᒻᒥ.

ᖃᓄᐃᑦᑐᐃᑦ ᓄᓇᖕᖑᐊᓕᕆᓃᑦ ᐱᓇᓱᐊᕐᑕᐅᓚᖓᕙᑦ ᓱᒃᑯᑕᐅᑎᑕᐅᑦᑌᓕᔪᓄᑦ ᓄᓇᓄᑦ ᒪᓂᔭᐅᒪᔪᓄᑦ?

ᐃᓕᑕᕆᔭᐅᔪᖅ ᓄᓇᐅᑉ ᐊᑎᖓ ᑐᑭᑖᕐᑕᐅᓛᕐᑐᖅ ᐊᑌᓐᓇᓂᐊᓕᕐᑐᒥᒃ ᓱᒃᑯᑕᐅᑎᑕᐅᑦᑌᓕᓂᕐᒦᑎᑕᐅᓯᑉᐸᑦ ᓄᓇ. ᑐᑭᓯᒪᔭᐅᔪᖅ ᑲᒪᒋᔭᓖᑦ ᑎᒥᐅᔪᑦ ᓄᓇᕕᒻᒥ ᐊᒻᒪᓗ ᓄᓇᓕᓐᓂ ᐊᒻᒪᓗ ᓄᓇᖃᕐᖄᓯᒪᔪᑦ ᐊᑦᑐᑕᐅᒪᔪᑦ ᑖᒃᑯᓄᖓ ᓄᓇᓄᑦ ᐱᑕᖃᕐᑎᓯᓛᕐᑐᑦ ᒪᓂᔨᒍᑎᒥᒃ ᐃᓕᑕᕆᔭᐅᔪᒥᒃ ᓄᓇᖕᖑᐊᒥᒃ ᑲᑎᒪᔨᖏᓐᓄᑦ ᓄᓇᖕᖑᐊᓕᕆᓂᕐᒧᑦ ᑯᐯᒻᒥ. ᑌᒣᓕᓐᓂᒥᔪᑦ ᑲᔪᓯᑦᓯᐊᑐᕕᓂᐅᑦᓱᓂᓗ ᓄᐃᑕᐅᑎᓪᓗᒋᑦ ᑲᓇᑕᒥ ᒥᕐᖑᐃᓯᕐᕖᑦ ᓄᓇᕕᒻᒥ.

ᓱᓇᐅᕚᑦ ᐊᑦᔨᒌᖕᖏᑐᑦ ᓄᓇᒥ ᑲᑎᑯᐊᔨᖏᑦ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ (JBNQA) ᐊᒻᒪᓗ ᑯᐯᒃ ᑕᕐᕋᖓᑕ ᓯᕿᓂᖓᓂ ᐊᖏᖃᑎᒌᓐᓂᖓ (NEQA)?

ᑲᑎᑯᐊᔨ I ᐊᒻᒪᓗ IB-N -ᓄᓇᖃᕐᖄᓯᒪᔪᑦ ᓄᓇᖁᑎᖓ ᑲᒪᒋᔭᐅᔪᖅ ᐊᒻᒪᓗ ᐊᐅᓚᑕᐅᑦᓱᓂ ᐃᓚᐅᔪᐃᑦ ᐱᕙᓪᓕᖁᑎᑦᓴᕆᔭᖓᓂ ᐊᑐᓂ ᐃᓄᐃᑦ ᓄᓇᓕᓐᓂ ᓄᓇᒥ ᑎᒍᒥᐊᕐᑎᑯᓐᓄ ᐊᒻᒪᓗ ᓇᔅᑳᐱᒃᑯᑦ ᓄᓇᒥ ᑎᒍᒥᐊᕐᑎᖏᓐᓄᑦ, ᑌᒣᒻᒪᑦ; ᐱᒍᓐᓇᐅᑎᖃᕐᖁᑦ, ᐅᖄᔭᐅᔪᓂᒃ ᐊᖏᖃᑎᒌᓐᓂᒥ, ᐃᓚᐅᑎᓪᓗᒋᑦ ᐆᒪᔪᕐᓂᐊᕈᓐᓇᓂᕐᒥᒃ (ᐊᒻᒪᓗ ᐱᒍᓐᓇᐅᑎᖃᕐᓱᑎᒃ ᓄᐃᑦᓯᒍᓐᓇᓂᕐᒥᒃ ᐃᖏᕐᕋᑎᑦᓯᒍᓐᓇᓱᑎᓪᓗ ᒪᙯᕝᕕᒥᒃ)

ᑲᑎᑯᐊᔨ I ᐊᒻᒪᓗ II-N -ᓄᓀᑦ ᐃᓄᓕᒫᓅᑦ ᑐᕌᖓᔪᐃᑦ ᑲᕙᒪᒃᑯᓄᑦ ᐱᒋᔭᐅᑦᓱᑎᒃ ᐃᓄᐃᑦ, ᑯᔩᒃᑯᓗ ᐊᒻᒪᓗ ᓇᔅᑳᐱᒃᑯᑦ ᐱᒍᓐᓇᐅᑎᖃᕐᕕᖏᑦ, ᑐᑭᖏᓐᓂ ᐊᖏᖃᑎᒌᓐᓂᐅᑉ, ᐃᓚᐅᑎᓪᓗᒋᑦ ᐆᒪᔪᕐᓂᐊᕈᓐᓇᕕᖃᕐᕕᒋᑦᓱᒋᑦ (ᐊᒻᒪᓗ ᐱᒍᓐᓇᐅᑎᖃᕐᓱᑎᒃ ᓄᐃᑦᓯᒍᓐᓇᓂᕐᒥᒃ ᐊᒻᒪᓗ ᐊᐅᓚᑦᓯᒍᓐᓇᓂᕐᒥᒃ ᒪᙯᕝᕕᒥᒃ)

ᑲᑎᑯᐊᔨ III – ᓄᓀᑦ ᐃᓄᓕᒫᓄᑦ ᑐᕌᖓᔪᑦ ᑲᕙᒪᒃᑯᓄᑦ ᐱᒋᔭᐅᑦᓱᑎᒃ ᐃᓄᐃᑦ, ᑯᔩᒃᑯᓗ ᐊᒻᒪᓗ ᓇᔅᑳᐱᒃᑯᑦ ᐱᒍᓐᓇᐅᑎᖃᕐᕕᖏᑦ, ᑐᑭᖏᓐᓂ ᐊᖏᖃᑎᒌᓐᓂᐅᑉ, ᐃᓚᐅᑎᓪᓗᒋᑦ, ᐃᓚᐅᑎᓪᓗᒋᑦ ᐱᒍᓐᓇᐅᑎᖃᕐᕕᒋᓇᒋᑦ ᐆᒪᔪᕐᓂᐊᕈᓐᓇᓂᕐᒥᒃ. ᐃᓚᒋᐊᕈᑎᐅᑎᓪᓗᒍ, ᒥᑭᒋᐊᕐᓂᐊᕈᓐᓇᓂᖅ ᐱᒍᓐᓇᐅᑎᖃᕐᕕᒋᔭᖓ ᐃᓚᐅᔪᐃᑦ ᐊᖏᖃᑎᒌᓐᓂᒥ.